Sylvi Listhaug kjem til årets Konradløp

• Olav Harald har vore passiv i stolen lenge nok, nå må han begynne markere seg!

Orda tilhøyrer ingen ringare enn FrP-politikar, Sylvi Listhaug. Ho kjem til Velledalen i spissen for ein heil delegasjon FrP-arar, som skal hjelpe Olav Harald Ulstein ta ordførar-rekorden under Konradløpet 1.mai 2024.

Det er tidlegare sykkylvsordførar, Jan Kåre Aurdal (KrF), som sit på rekorden, då han gjorde tida 30.52 som sitjande ordførar i 2003. Aurdal har Konradmedaljen i gull etter seks deltakingar. Det same har Odd Jostein Drotninghaug (Sp). Men Drotninghaug var ikkje ordførar då han i 2006 leverte personleg bestetid med 31.21

Olav Harald Ulstein står med fire deltakingar (perioden 2005-2008) frå tidlegare. Bestetida frå 2008 på 22.21 er på grensa til imponerande. Problemet hans er at han var ikkje Sykkylven sin ordførar i 2008. Men det er han no, slår Sylvi Listhaug fast med eit snev av indignasjon i stemma:

• Skal Olav Harald ha noko i beltet når han går av, er det på høg tid at han intensiverer arbeidet sitt. Noko av det lettaste burde vere å ta ordførar-rekorden under Konradløpet i Velledalen, det er langt verre å skrote eigedomsskatten, sjølv om dette i fyrste fireårsbolk berre vert aktuelt for innbyggjarar i Ramstaddalen.
• Men faktum er; Ulstein har mist det meste – kanskje alt - av spensten i steget sitt sidan 2008. Difor må partiet trø til, han treng rett og slett hjelp – og tida er knapp, det ser vel også du!

FrP kjem med ein topptung delegasjon, leia av Sylvi Listhaug sjølv, til Velledalen natt til 1.mai:

• Olav Harald vil få det beste av utstyr, som inkluderer ein italiensk silketrikot, og dei dyraste karbon-skorne som er å oppdrive nord for Dovre. Frank Sve vert bas på partiet sin eigen drikkestasjon, med ein eigenprodusert Blåbær-toddy med vatn frå Svartevatnet og blåbær henta like bak skivene på skytebana i nærkeilen (kortreist). Trioen Bård Hoksrud, Per-Willy Amundsen og Terje Søviknes vert fartshaldarar fram til Bedehussvingen i Velledalen. Her tek  den mest andelege i lokalpartiet, Frank Kjøde, over og losar Olav Harald trygt over mållina. Noko som også vil vere ein fin gest overfor lokalpartiet i Sykkylven.

Listhaug seier ho er ganske sikker på at Ulstein vil slette gjeldande ordførar-rekord:

• Du skal hugse det, at Aurdal sin rekord (30.52) er tufta på ei kilometertid på kring 6,51 minutt per kilometer. Faktisk er Erna Solberg målt raskare enn det på Stortinget i etterkant av ektemann Sindre sine «stunt» - vel å merke på korte distansar.

……. Og greier han det ikkje i år, får han prøve på nytt neste år med nye fartshaldarar…. eg reknar med han sit som sykkylvsordførar då også…… Men ja, det vil vere ei kraftig ripe i lakken om han mislukkast, ropar Sylvi etter oss.

Friidrottsleiar i Velledalen IL, Alf Petter Bøe, er fåmælt i kommentaren:

• Dette skal bli kjekt. Men personleg håper eg han feiler. Då må dei optimalisere forholda til neste forsøk, som truleg betyr ny asfalt på Nakkebergvegen. Eit pluss for Velledalen!