Rik idrettslaurdag for store og små

På heimleg grunn vert den årlege, etter kvart tradisjonsrike, o-samlinga arrangert

Base for o-samlinga er som før Ungdomssenteret i Ladalen (Fjellsætra). Her er det meldt om over 100 deltakarar med Molde & Omegn, Emblem IL og Velledalen IL som dei største klubbane. Nettsida har fått lite eller inkje informasjon om samlinga, men i dag vert det instruksjon om ulike tema på dagtid og sosial samling om kvelden. I morgon vert det mellom anna løp. Velledalssamlinga i orientering nærmar seg truleg 10 års jubileum, og har vore særdeles populær innan o-miljøet. Pernille Lervåg med hjelparar frå eigen klubb, Emblem IL og o-kretsen, har gjort ein kjempejobb – og fått klaff så det held – med tiltaket.

Flyttar vi oss til Ikornnes er Stavekollen Sky Run det store i dag. Grunna kollisjonar med andre løp er ikkje deltakinga ovstor. Kring 45 påmelde i morgontimane i dag, av desse eit tosifra tal frå Velledalen IL. Dei vil truleg markere seg. Start klokka 11.00 i konkurranse.

I Trondheim spring seks VIL-utøvarar i dag. Emma og Christina Holmberg spring heilmaraton. Ole-Peder K Holmberg, Bengt Hole Alnes og Bjørn Inge Gjersdal spring halvmaraton, medan Ildri Bøe nøyer seg med 10 km.

Melshornløpet vert arrangert i Volda med Ørsta IL som arrangør. Her representerer Jone Schmidt Breivik Velledalen IL i klasse M 15-17. Jone er i form og vil gjere det bra her.

I hovudstaden vert «Toughest Oslo» arrangert. Her vil heilt sikkert Anette Heimli Jokstad og Nikolai Handle Jensen markere seg. Avslutninga her plar vere opp heile unnarennet i Holmenkollbakken med målgang på kulen. Den riv!

KK-løpet, eit reint kvinneløp i Oslo, har stor deltaking frå Stranda og Sykkylven, men få eller ingen frå Velledalen IL. Vi kjem tilbake med namn og tider frå løpet der distansane er 5 eller 10 km.

I morgon, 8.september, vert ein særdeles interessant VIL-dag. Då spring Frode Vasset, Espen Utgård Sæther og Njål Torillson Tyssing alle halvmaraton i Drammen med Constantin Rust som sjølvutnemnd fartshaldar. Her vi det gå unna, med den sterkaste halvmaraton-kvartetten Velledalen IL nokon gong har mønstra i eitt og same løp. Nettsida sitt råtips: Snittida til dei fire vert 1.13.44.

Og så har o-samlinga løp i Ladalen.

Vi ynskjer alle som skal i aksjon hell og lukke!