Så vidt båten bar for Roger Malvin

Slo dottera, Oda Alette, med 11 sekund under Hytteplanmila

To av Velledalen IL sine deltakarar under Hytteplanmila 2024 var far (Roger) og dotter (Oda Alette), begge med etternamn Hole. Roger Malvin er vel kjend med slike duellar, etter at han fleire somrar køyrde løpsduellar mot broren Jens Christian når begge var heime. Der var distansen kring 4,5 km. Duellen mot dottera Oda var meir enn det doble.

Og det vart ein jamn far/dotter-duell. Dei starta ikkje i lag, men arrangøren sine gode data frå løpet fortel alt:

Roger var kvass i starten og 16 sekund føre alt på fyrste kilometeren. Etter fem kilometer var avstanden auka til 25 sekund. Så kom ein periode der dei var temmeleg jamgode. Ved passering ni kilometer hadde Roger sitt føresprang skrumpa inn til 20 sekund. På siste kilometeren tok Oda Alette nye sekund. Roger kryssa mållina på 44.12, Oda Alette brukte 44.23. Altså fars-siger med 11 sekund!

Ulik disponering

Hos Roger skilde det 33 sekund mellom raskaste (4.04) og seinaste (4.37) kilometer. Roger hadde beste plasseringa i klassa etter to kilometer. Då var han nummer 48. I mål som nummer 62. Hos Oda skilde det berre 15 sekund mellom raskaste (4.19) og seinaste (4.34) kilometer. Ho arbeidde seg heile tida framover på resultatlista og enda som nummer 173 av 414 fullførande i klasse K 23-34. På siste fem kilometer var Oda (22.27) raskare enn faren (22.41).

Ein flott duell som ingen hadde kontroll på, sidan dei ikkje starta likt. Det KAN vere duka for rollebyte i 2025, eller i alle høve inspirasjon til vidare trening.