Idrettsgalla i Velledalen IL 29.desember

Same dag den lokale løpssesongen avsluttar med Nyttårsmaraton i Ålesund, held Velledalen IL Idrettsgalla i Straumgjerde.

Arrangementet er tinga i Odd Fellow sitt selskapslokal i Straumgjerde, sundag 29.desember. Opplegget vert som tidlegare år ei sosial samling for klubbmedlem og aktive utøvarar. Det vert god servering og nokre underhaldnings-innslag, mellom anna med foto frå idrettsåret 2024. Vidare skal ei rekkje prisar delast ut. Det kan nemnast at det på herresida har vorte sett nye klubbrekordar på stort sett alle distansar. Vi nemner Njål Torillson Tyssing på 3000meter og 5000 meter baneløp, Constantin Rust på 10 km landevegsløp og Espen Utgård Sæter på halv- og heilmaraton. Personlege rekordar har blitt sett i fleng, av Vegard Riksheim Tandstad på alle distansar frå 3000 meter baneløp som kortast til heilmaraton i Amsterdam som lengst.

     2024 har vore eit rikt idrettsår. Ikkje mindre enn 73 personar (meir enn seks 11-lag i fotball) har representert Velledalen IL utanfor Sykkylven kommune. Då tel vi altså IKKJE med Konradløpa, skirenn i Ladalen, O-samling i bygda eller dei ulike mosjonsaktivitetane laget står bak. Talet 73 aktive er ganske sikkert det meste i laget si 118-årige soge.

På grunn av maten må vi ha førehandspåmelding til Idrettsgallaen. Tilskipinga er sponsa av Velledalen IL, så ingen treng frykte prisen. Men merk i fyrste omgang av datoen, sundag 29. desember på ettermiddag/kveld. Priskomitéen lyder desse namna: Bjørn Arve Brune, Frode Mauren og Alf Petter Bøe. Desse tek meir enn gjerne mot innspel. Om nokon vil dele ut sin eigen pris – snakk med komitéen, så vil det truleg ordne seg.