Loddtrekning om premien på Dalemyra

5 cm snø i midtsirkelen gav premie etter loddtrekning til Kjetil Pål Brunstad.

Tippefrist var seinast 17 desember. Ekspertisa innan vêrmelding, sa at det ville neppe kome snø på Dalemyra fram mot det aktuelle tidspunktet, 23 desember klokka 12.00. Difor tippa klart dei fleste, naturleg nok 0 cm. Når ingen hadde tippa mellom 1-10 cm var saka klar, etter at nestleiaren i VIL hadde målt snødjupna til 5,1 cm. Det gav loddtrekning mellom alle som hadde tippa 0 cm, som dermed vart det beste tipset. Og slik hadde det seg at tipparar både frå Stranda, Ålesund og Sykkylven kjempa om premien. Her gjekk flaksen til Kjetil Pål Brunstad, ein kar som tala sjølvaste Ivar Hol midt imot tidleg i desember. Hol meinte nemleg det vart vêromslag og godt med snø frå 15. desember. Ei prognose som slo feil, medan Kjetil Pål hevda nedbøren fram mot jul heile tida ville vere i grenseland mellom snø og regn, som også var klart nærare sanninga.

Det høyrer med til soga at tidlegare klubbmeteorolog i Velledalen IL, Per-Gunnar Holmberg, hadde tippa 14 cm. Hadde det vore 0,4 grader (eller der omkring) kaldare på Dalemyra siste døgnet, kunne gartnaren vår stukke av med sigeren….. 14 cm ville i alle høve vore eit godt tips då.

Det mest orginale tipset leverte Roger Vanebo. Han tippa 24 cm, men frykta at ein tidlegare VRF-spiss som brukte opphalde seg mykje i midtsirkelen kunne vore der og trakka ned snøen, slik at sjølve målinga kunne bli både vanskeleggjort og omstridd.

Gratulerer til Kjetil Pål og takk for deltakinga til alle som kasta glans over konkurransen!