Litt om startkontingentar på løpsfronten

Eksempelvis betalar ein 250 i kontingent for KM halvmaraton på Vartdal i mai, 590 for same distanse i Ålesund 14 dagar seinare

Sparebank 1, Vartdalsstranda halvmaraton 2025, vert arrangert 24.mai. Løpet har distansane 10 km og halvmaraton. Den lengste distansen er KM for Møre og Romsdal, og såleis eit viktig løp. Arrangør på Vartdal er Ørsta IL. Her er deira prisar for startkontingent:

Trimløp kr 100,-

10 km kr 250,-

Halvmaraton kr 250,- (anten ein deltek i KM eller ikkje)

14 dagar seinare – 7.juni – vert Ålesund Maraton arrangert, med Ålesund FIK som arrangør. Her er deira prisar for startkontingent:

Barneløp: Kr 120,-

5 km: kr 350,-

10 km: kr 490,-

Halvmaraton: kr 590,-

Heilmaraton: kr 690,-

Stafett: kr 750 per lag

Skilnaden er slåande. Vi kan sjå nærare på den mest populære distansen, halvmaraton. Her må ein altså ut med 590 kroner i Ålesund, medan ein får same «vare» for 250 kroner på Vartdal. Endåtil med vesentleg betre premiering på Vartdal (mange uttrekkspremiar + KM-medaljar). I 2024 var 382 utøvarar påmelde til halvmaraton i Ålesund. Med same tal i år tek arrangøren inn meir enn 225 000 kroner i startkontingent berre på halvmaraton!

       Vi er klar over at mange arrangørar har liknande prisar som Ålesund. Men då snakkar vi stort sett om «strøkne» arrangement.

Idretten må vakte seg vel for at tyngda av arrangement skal bli gullgruver på profitt-sida for arrangørane. Nokre kan vi tole, men fleirtalet av massemønstringane bør ha ein overkomeleg prislapp, og det er viktig at utøvarane sluttar opp om desse. Ingen, som i 2024 var både i Ålesund og på Vartdal, vil kunne hevde at Ålesund hadde eit betre arrangement. Snarare motsett.

I august vert Stranda Fjord Trail Race arrangert i nabobygda vår. Her er deira prisar (førebels fire påmelde frå Velledalen IL):

12 km: 750 kr – 950 etter 1.mai

25 km: 1100 kr – 1300 kr etter 1.mai

48 km: 1550 kr – 1650 kr etter 1.mai