VIL-veteran fyller 70 år

I dag, 24.februar, fyller Bjørg Frøystad Hole 70 år.

Bjørg Frøystad Hole har markert seg sterkt innan idretten i Velledalen. Bjørg er oppflaska i Sykkylven IL, men som ganske ung flytta ho til Velledalen – til kjærleiken, og til eit småbruk på Hole.

Damefotballen i VRF-regi vart starta opp tidleg på 1980-talet. Her er det rett å kalle Bjørg pioner, saman med Eldrid Myhre. Den gongen var det slik at jenter/kvinner ikkje hadde spela aldersbestemt fotball, nei, dei gjekk rett inn på A-laget i «vaksen» alder. Mange kom dit utan å vere «turre bak øyrene», og då var det nyttig at Bjørg og Eldrid sette standarden. Både i trening og kamp.

      Bjørg fekk æra av å vere einaste målscorar då VRF møtte Sykkylven til fyrste treningskampen mellom to sykkylvslag på Slettegjerde i 1982. Kampen ende 1-0 til VRF. Bjørg spela vanlegvis midtstoppar, ein sjeldan gong spiss. Ho var kaptein for VRF-damene som i1984 vart nummer to i kvinneserien avdeling B, bak Volda, men føre Stranda, og klart føre Sykkylven

I 1986 vart Bjørg Frøystad Hole den fyrste kvinnelege leiaren i Velledalen IL. I 2007 vart ho Velledalen IL sin fyrste kvinnelege æresmedlem. Så pioner også på dei felta. Bjørg kan sjå tilbake på ein enorm innsats for Velledalen IL på ei rekkje frontar. Som idrettskule-drift, diverse trimparti og trenings-grupper, Konradløpet – der ho har vore fast oppvarmar og drikkestasjons-hjelpar. Og ikkje minst trimgruppa, der ho har lang fartstid både som gruppemedlem og gruppeleiar. Ho har vore med å arrangert eit utal Romjulsmarsjar og diverse trimbingo-arrangement til Brunstad- eller Myrdalssætra. Og idrettsmerke-prøver gjennom mange år. Bjørg er heller ikkje tung å be om laget treng eksempelvis ei kake.

Bjørg fortener nemninga «slitar». Ein trufast hjelpar som aldri har tenkt mest på seg sjølv, eller spara seg når fellesskapet trong ho

Hjarteleg til lukke med 70 års dagen, Bjørg!