Rapport frå Tyssing-guten: Spring Maraton i Tokyo på sundag!

Ny rapport frå Njål Tyssing! Her er det Tokyo Maraton som er hovudtemaet. Løpet går førstkomande sundag.

Tusen takk, Njål - og lukke til!

Er det fleire som vil sende rapportar om trening, løp eller relatert - gi oss gjerne ein rapport!

Oppkøyringa mot Tokyo Maraton 2025 gjekk eigentleg veldig bra fram til 1. juledag 2024. Eg hadde starta med langturar, noko eg har hatt tungt for i tidlegare maraton-oppkøyringar. Blant anna sprang eg 36 km første feriedagen i juleferien (fredag) med ein påfølgande langtur på 28km langtur mandagen. Turane gjekk etter planen veldig roleg, i håp om litt raskare turar i januar og februar. Men Adam/Njål var ikkje lenge i paradis. 1. juledag kom forkjølelsen for fullt. Jaja, tenkte eg den gongen. Så er eg iallefall ferdig med sjukdom, og kan trene for fullt i januar og februar. Så etter 9 dagar med sjukdom var eg iallefall i stand til å gå jobb og småjogge litt igjen. 

Første halvdel av januar såg eg igjen lyset, med både ein langtur på 3 timar, og nokre solide terskeløkter på heimemølla og innandørs på løpebana på Bislett. Eg prøvde til og med litt Vo2-maks-trening etter ein podcast kor det var mykje snakk om å løfte taket.  Draumen om å kunne springe under 2.35 på maratonet i Tokyo var svært tilstade! Iallefall i mine tankar....

Men 16. januar låg eg igjen rett ut. Spying, feber og det som var verre var. Truleg ein covid-variant. Jaja, tenkte eg, så er eg iallefall 100% ferdig med all mogleg sjukdom, og eg skal få trent bra dei neste 6 vekene. Og denne gong kom eg meg faktisk nokså raskt til hektene igjen med 5 dagar sjukdom ca. Men nei, 31. januar kom igjen både feberen og såre lunger på vitjing. Og denne gongen blei dei lenge. Eg rakk to dagar kor eg antok eg var frisk, før feberen igjen slo til. Så i perioda 31. januar - 19. februar rakk eg ein intervall. Ikkje heilt optimalt. Men kanskje enno verre er kjensla at ein både og har vore sjuk og fysisk blitt satt eit godt stykke tilbake. 

Så torsdag (20. februar) starta panikktreninga for fullt med nokre intervall og ein langtur. Siste intervall blir tysdag 25. februar før eg set meg på flyet til Tokyo på ettermiddagen. I god tru om at ikkje kan bli sjuk igjen....

Tankar om løpet og gode personlege tider har eg eigentleg lagt frå meg for minst ein månad sidan. Eg trur nedsida er betydeleg større enn oppsida, så eg håper å kunne starte med ei løpstid på ca 3.48 per kilometer, noko som tilsvarer ca 1.20 på første halvdel. Om eg klarer å halde dette tempoet er eg neimen ikkje sikker på. Men ser eg 2.39.59 i mål, bør eg vere veldig nøgd. Eg er ikke so lysten på å gjenta smellen under Oslo Maraton med 2.42 og nærmast gange siste kilometrane, så det er mogleg eg skrur ned farta kjapt allereie i første halvdel.   

Det blir eg og pappa som tek turen austover. Sju timar i tidsforskjell, lang reiseveg og elendig treningsgrunnlag i vinter gjer at turen blir meir ei oppleving enn eit jag etter ei godkjent tid. Vi tek det litt som det kjem, bokstaveleg talt. Ingen av oss har vore i Japan før, og sjølv om turen ikkje blir so lang som den burde vore (landar onsdag lokal tid og reiser søndag kveld etter løpet), vonar vi å få sett iallefall litt av Tokyo og det som skil dette landet/byen frå Oslo/Sykkylven.