Sterke Hyrox-prestasjonar i Malaga

Les korleis det gjekk med Anette og Nikolai under pro singel Hyrox i spanske Malaga.

Velledalen IL har hatt tre utøvarar i aksjon i Malaga, Spania, denne helga. Alle leverte sterke prestasjonar. Laurdag hadde Sunnmørsposten eit to siders oppslag i papiravisa om den veksande sporten Hyrox. Same helg opplever Velledalen IL at Anette Heimli Jokstad vart beste norske kvinne, og Nikolai Handle Jensen nest beste norske mann, under eit stort stemne i Malaga. Der idrettsgreina var nettopp Hyrox, og deltakarane kom frå eit utal ulike nasjonar.

Anette konkurrerte mot 130 kvinner frå mest heile verda. Ho fekk ein respektabel 28. plass total, og vart nummer 11 i klasse K 35-39, på tida 1.14.13. Nest beste norske utøvar vart Helene Lesund på tida 1.29.31.

Nikolai Handle Jensen hadde 400 konkurrentar i herreklassa. Av desse vart han nummer 68, og finfin 18 plass i klasse M 35-39. Tida til Nikolai vart 1.07.00. Med den tida vart han nest best av dei norske, berre slegen av Markus Knudsen Tveit (1.04.43)

Anette har lagt ut fylgjande Strava-kommentar:

• Hyrox Malaga 1.14.13.
• Ny pers med sju minutt. Ett år siden forrige pro singel. Et høydepunkt at wallballs var bedre enn noen gang.

Når så Espen i tillegg sette klubbrekord for Velledalen IL på halvmaraton i Malaga i dag med tida 1.09.16, må vi kalle det ei retteleg GOD Malaga-helg for laget vårt.