Klesskandale for Velledalen IL - løpar har fått straff

Kleskandale for Velledalen IL – løpar har fått straff

Styreleiar Ove Skylstad vil først stadfeste situasjonen.

"Ja, eg kan stadfeste at ein løpar i Velledalen IL har fått problem etter å ha modifisert løpsklea sine for nokre år sidan. Klea skal riktig nok ikkje ha vore nytta dei siste par åra. Vi håpar trass alt det går bra med vedkomande."

Leiar i friidrettsgruppa, Alf Petter Bøe, kan stadfeste at det er snakk om Frode Mauren.

"Eg kan no dele at det er friidrettsløpar Frode Mauren. Han melde frå om hendinga tidlegare i år. Eg vil vere rask og presisere at dette ikkje er fullt og heilt Frode sin feil, då han har hatt ein samarbeidspartnar som har utført justeringane."

Det viser seg nemlig at det var etter at Frode traff Susan Gjerde at løpstidene stupte. Susan, som no er Frode sin ektefelle, skal ha sydd om alle VIL-klea hass, noko som har endra Frode sin aerodynamikk under løp. Eit døme; frå å springe ei mil på over 40 minutt tilbake i 2017, var tidene raskt pressa ned til godt under 37 minutt.

Tek sjølvkritikk

Stemninga er ikkje på topp i kaféavdelinga til Nærbutikken i Velledalen denne første tysdagen i april. Nestleiar Atle Hole og friidrettsleiar Alf Petter Bøe drikk ein kaffi og knaskar på sjokolade og litt fersk bakst når redaksjonen kjem på besøk, men skandala heng over dei. Sjølv om dei synast det er ei lei sak, er dei også kritisk til seg sjølv og apparatet i Velledalen IL som ikkje har klart å fange opp ein så graverande feil på eit tidlegare tidspunkt.

"Ja, vi må ta sjølvkritikk på dette. Spesielt eg og Alf Petter som brukar fleire timar i veka på å synse på tider og rekne dei om til seniortid, Konrad-tid og andre tider. At ein lastebilsjåfør «plutseleg» skal springe på 36-talet på ein 10-kilometer (journ. anm.: noko som er veldig raskt for ein mann i slutten av 40-åra) ser vi i ettertid ikkje harmonerar", fortel Hole.

Velledalen IL undersøkjer no klea til andre løparar som har hatt merkeleg stor framgang, men heldigvis utan funn.

"Vi vil rette ei takk til Liv Hole som måtte legge vekk strikkepinnane og har gått gjennom saumane til fleire hundre plagg sidan saka vart kjend for oss for å avdekke eventuelle feil", fortel Bøe. Han kikar ned på arket framføre seg og tel.

"«Faktisk e vi opp i «tri-honnjer-å-syssjå» (317) kontrollerte plagg»", held han fram på si karakteristiske dialekt. "Og heldigvis er arbeidet hennar utan resultat", avsluttar han.

"Aerodynamikk har utruleg mykje å seie"

Vi har snakka med Jan Rakottiay, kjend som «Rakett-Jan». Jan er ein av dei få i medlemsmassa til Velledalen IL som driv med motorsport. Han er truleg den som har størst kunnskap om aerodynamikk i idrettslaget. Han kan stadfeste at luftmotstand har mykje å seie i sport som inneheld fart, men er overraska over at kle kan gjerast så «raske».

"Har Susan så god peiling på aerodynamikk, må ho gjerne sjå på bilen min ein dag. Her er det viktige sekund å hente også innan motorsport." fortel Jan.

Har fått straff

Susan Gjerde skal no ha fått konfiskert symaskina, og alle klea som er tukla med er levert til miljøstasjonen Bingsa i svarte sekkar. Frode Mauren kjøpte komplett ny kleskolleksjon for ei par år sidan, og har brukt desse sidan. 

"Vi vart litt gira rundt 2018, men innsåg at det var feil. I etterkant av alt bråket rundt hopparane på landslaget så tenkte vi at her er det berre å melde frå, så det er først no det vart kjent", fortel dei.

Frode si straff er ei karantene gjennom 2025, der han ikkje får lov å springe løp under gitte tider. Til dømes distansa 10 km. får ikkje Frode springe raskare enn 40:00, noko tidene på dei tre siste vinterkarusellane i Ålesund vitnar om. Spring han raskare, blir han diskvalifisert og må betale ein viss sum i bot til friidrettskretsen for kvart sekund han er under grensa.

"Eg må berre ta ein dag om gongen og heller bruke tida godt på trening. Så får eg kome sterkare tilbake i 2026 når karantena er over.", avsluttar Frode. Susan og Frode takkar alle i Velledalen IL for korleis saka har blitt motteke.

Både Frode, Susan og Velledalen IL har no lagt saka bak seg og ser framover.