Stiller Velledalen IL under Holmenkollstafetten 2027 ?

Spørsmålet vart reist under løps-treninga på Ikornnes Idrettspark same dag stafetten vart avvikla i Oslo.

Så langt tilbake som 1980 var Velledalen IL på plass i Oslo med lag under Holmenkollstafetten. Herrelag vart stabla på beina i 1980, 1981, 1982,1983 og 1984. Løypa var nok litt annleis då enn no, men bestetida til Velledalen IL frå 1981 (45 år sidan) lyder 54.42. Og faktisk mønstra Velledalen IL også damelag i 1982, 1983 og 1984. I ei tid der langt færre løparar enn i dag held til i Oslo. Primus motor for denne satsinga var Terje Aurdal.

Dei som sprang på Velledalen IL sitt lag i 1982 var – frå 1. til 15. etappe:

Einar Magne Fet

Jan Egil Årnes

Kai Roger Skylstad

Atle Jomar Hole

Bård Per Erstad

Terje Sigbjørn Aurdal

Bjørn Harald Vanebo

Nils Terje Skylstad

Nils Petter Støyva

Jarle Svindseth

Ove Inge Skylstad

Pål Rune Fet

Svein Martin Lid

Sveinung Grebstad

Per-Gunnar Holmberg.

Eit ganske så ungt lag den gongen. Bård Erstad og Einar Fet dei einaste over 30 år, Svein Martin Lid den yngste(18). Elles vart Pål Rune Fet 20 dette året, medan Hau-tvillingane, Ove og Kai, var 21.

Damelaget frå 1982 hadde med fire løparar frå Velledalen IL. Det er Karete Hjorthol , Bente Brunstad, Inger Riksheim og Benedikte Holmberg (tre av dei i gult i fremste rekkje) Fleirtalet på laget hadde band til Sykkylven IL, medan Ikornnes IL også var representert (Sølvi Sjøholt).

Til slutt nemner vi at fylgjande VIL-utøvarar som vi veit om sprang Holmenkollstafetten i går:

Hilde Riksheim Tandstad – Norabakken

Anette Heimli Jokstad – ein  etappe for Tyrving, ein for jobben

Ellen Marie Hole – langetappe for jobben

Elisabeth Taubøll – sprang 2.etappe

Njål Torillson Tyssing - sprang to etappar

Constantin Rust – sprang to etappar

Roger Malvin Hole – sprang for jobben (Bama)

Vidare veit vi at : Mathilde Sofie Kjellsbøl Hole, Oda Alette Kjellsbøl Hole, Oskar Johan Kjellsbøl Hole, Per Kåre Langlo (eks Stranda) og Janne Elin Vatnaland (Konradløp-vinnar 2026), alle var i aksjon.

Men altså: Det vart ytra ynskje om eit come back frå gjengen som deltok under løpstreninga på Ikornnes Idrettspark laurdag morgon. Og faktum er: Om klubben vil, greier ein ganske lett stille tre lag; herrelag, kvinnelag og eit veteranlag.

       Men slikt må bestemmast tidleg. Kva lag og kor mange – og ikkje minst; det må PRIORITERAST av løparane i ei tid der det formeleg aular av tilbod.