May Evy «Årets Utøvar» på kvinnesida i 2020
Postet av Velledalen Idrettslag den 21. Jan 2021
I sitt fyrste år i
Velledalen IL (2019) vart May Evy Nesheim kåra til «Årets Nykomar». I 2020 tok
ho steget opp, då juryen på fire personar kåra henne til «Årets Utøvar» på
kvinnesida.
Ho har vore flittig
deltakar i vinter- og sommarkarusellen i Ålesund, der ho har variert mellom
distansane 5 og 10 kilometer. I slutten av juni var ho på plass i Fjørå som
deltakar i Mefjellet Opp. Her vart ho nest beste kvinne totalt og klassevinnar
i klasse K 45-49. Prestasjonen gav pengepremie.
I august vart ho
klassevinnar og beste kvinne totalt i Østremsetra Opp. I september tok ho
sterke tredjeplassar i Melshornet Opp (slegen av to bergensarar) og Nesaksla
Opp (Åndalsnes) som talde med i kretscupen, motbakkeløp. I oktober kom ein ny
klassesiger, denne gongen rundt Snipsøyrvatnet (Hareid). Klassevinnar vart ho
også i fyrste løpet i vinterkarusellen i november (10 km) og like eins i
desember i andre løp, då på 5 kilometer.
Prisvinnaren må omtalast
som ein særs stødig løpar, som alltid leverer nær sitt beste. Vi har enno til
gode å oppleve svake prestasjonar. May Evy er i tillegg ein løpar med stil og
profil. Ei retteleg føregangskvinne på å stille i VIL sine klubbklede under
konkurransar. Noko friidrettsleiar, herr Bøe, set umåteleg pris på.
Velledalen IL takkar for måten
du har profilert klubben vår på i 2020, vi takkar for innsatsen, og ikkje
minst;
gratulerer med velfortent pris!