ALF PETTER BØE – RIR PÅ ANDRE BØLGJA

ALDER: 53

BUSTAD: Velledalen

ARBEIDSSTAD: J.E.Ekornes
AS på Ikornnes
 

 Den fyrste bølgja levde Alf Petter ut på Nordmøre. Med
fotball for Bøfjord IL og friidrett (løp) for Rindals-Troll. Toppen nådde han
kring 1995, med 1.08 på halvmaraton og 32-talet på mila. Det er fort! På slutten
av 1990-talet flytta han til Sykkylven og fekk med seg tre sesongar i
Hundeidvik IL, fotball i lågare divisjonar. Amorøse kjensler gjorde Velledalen
til neste stogg. Her dyrka han familielivet, som gav to kjekke døtre i Ildri og
Lovise, men det la han aldeles brakk sportsleg.

Kring ti år seinare - og 30 kilo tyngre - rundt år 2009, starta
foderiet sin mest ihuga Rosenborg-tilhengar, på bølgje nummer to. Han trena seg
sakte men sikkert opp til godt veteran-nivå, frå «ungkarsbasen» i Tregardane, med
klassesigrar i ei lang rekkje lokale løp. Alf Petter har ord på seg for å vere
mannen som spring mest i Velledalen, og den som brukar mest tid i kafé-avdelinga
på den lokale Nærbutikken. Dette gjorde han til friidrettsleiar i Velledalen IL.
Den posisjonen kler han.
 

Elles likar AP Bøe, som han vert kalla mellom vener i
Velledalen, å lese. Helst biografiar om tidlegare politikarar og andre kjende
personar. Han går jamleg fjellturar, der Slogen frå Liasætra er ein stødig
favoritt. Han er dyktig på sportsleg synsing, då helst saman med nestleiaren og
kasseraren i Velledalen IL, i tillegg til eksprimentelle Frode Mauren. På
kvinnefronten likar han dei best i alderen 38-53 år; slike som kan gå eller
jogge minimum 30 minutt samanhengande.
 

Alf
Petter

Er Vørterøl
favorittdrikken din?

Det kjem høgt opp på lista, men iskald cola frå glasflaske toppar
klart.
 Kva er
favorittretten din?

Det må bli laks i rømmesurring, med nypoteter til.
 Fortel kort om
idrettskarriera di.

Fotball og løp fram til rundt årtusenskiftet. Låg «brakk» fram til
omtrent 2009. Rehabiliterte kroppen og aktiv mosjonist sidan den gongen.

Korleis og kvifor
medlem i Velledalen IL?

Det hugsar eg faktisk ikkje, men trur eg har vore medlem i omtrent 10
år.

Når var du sist på
ein VIL-trimpost?

Var på Vellesætra og Brunstadsætra 1. april. Prøver å få med meg 1000
trimpostpoeng kvart år. (Journ.anm.: Bøe har truleg vore på trimpostar fleire
gongar etter intervjuet var gjort.)
 Sportsleg mål for
det neste året?

Det er å springe under 40 blank på 10 km. og under 1 t. 30 min. på
halvmaraton. Her må eg legge til at det ikkje er verdas undergong om det ikkje
går.

Favorittmusikk?

Til trening anbefalar eg å høyre på P6 Rock, musikk med trøkk. Elles
høyrer eg på det meste.
 Kva likar du å sjå
på fjernsyn?

«Sauen Shaun» er ein kongeserie.
 Kor likar du best
å feriere?

Beste plassen er utan tvil heimbygda mi, Bøfjorden i Surnadal kommune.
 Har du eit
treningstips å dele med lesarane?

Trur det kan vere lurt å trene saman med andre, det gjer det lettare å
halde treningsmotivasjonen oppe. Ein skal heller ikkje ha for høge ambisjonar
til å byrje med. Varier lengde og fart på treningsturane, gå gjerne i
motbakkane.