Vellukka «vårsprint» i Velledalen

Løpet var mest som ein
eksamen å rekne for Velledalen IL. «Vårsprinten» skulle nemleg markere laget
sin debut som åleine-arrangør. Ved tidlegare løp har o-gruppa til Emblem IL
alltid halde ei hjelpande hand over arrangementa.

Tilskipinga var elles den
fyrste for laget under nyvinninga flexoløp, med fri start innanfor gitt
tidspunkt som eitt av kriteria. Emblem IL deltok med ein fyldig tropp som kom
direkte frå treningssamling i Stryn kommune. Men kanskje aller mest gledeleg at
Valldal IL kom med ein sterk tropp idrettsspreke gutar og jenter som sette spor
etter seg i resultatlistene. Ny klubbar er meir enn velkomne inn i varmen innan
orientering.

Sprintløpet gjekk i tre
ulike løyper. Den kortaste kring kilometeren lang, ei på to kilometer og den
lengste målte kring tre kilometer. I tillegg hadde «råtassane» ei eiga kortløype.

Audhild Bakken Rognstad var
raskast gjennom lengste løypa med tida 20.45. Ho representerer Emblem IL, er
tidlegare landslagsutøvar i skiorientering og av opphav frå Lillehammar. Nærast Audhild kom kretsleiaren i Møre og
Romsdal, Henning Teigene frå Emblem IL, med tida 21.25. Markus Glad, med opphav
frå Tromsø,
   sytte for at det vart
trippel Emblem med tida 22.32. Jan Ole Fuglem, Valldal IL, gjorde sterke 24.11
i sitt comeback i o-løypa, og vart med det tredje beste herre-løpar. Geir Helge
Grebstad vart best av Velledalen IL sine løparar i herreklassa, Monica Hole
Bjørneseth best av damene.

  -
   
 
 Ein flott dag. Vi
har både gledd oss og grutt oss litt til denne dagen, men alt har gått over all
forventning, konkluderte løpsleiar og primus motor, Pernille Ibsen Lervåg etter
det heile var over.

O-gruppa i Velledalen IL
arrangerer nytt kretsløp i september.

Sjå alle resultata:

 http://eventor.orientering.no/Events/ResultList?eventId=9982&groupBy=EventClass