Ordførar Drotninghaug toar sine hender

Ordførar Drotninghaug
sukkar tungt. Hans dagar i lokalpolitikken kan vere talde ved neste lokalval.
Han er ikkje sikker. Seier han må på leit etter vitnemålet frå vidaregåande
skule.

Forslaget er lansert av Høgre-duoen Jan
Tore Sanner og Torbjørn Røe Isaksen – sistnemnde kunnskapsminister må vite.
Forslaget får etter alle solemerke fleirtal på Stortinget.

Vert det fleirtal, skal
nær-kunnskaps reforma gjelde frå 1. jauuar 2020. Men fortvil ikkje, det er lagt
opp slik at dei som ikkje har kunnskapen inne, kan skaffe seg den gjennom
intensiv-kurs i landet sine tolv største byar. Ei studieveke, etterfylgd av
eitt eksamensforsøk i kvar by.

Sanner og Røe Isaksen har
laga fylgjande døme:

«NN er kommunepolitikar i
Sykkylven og har 3 i karakter i samfunnsfag frå vidaregåande skule. Men sidan NN
har eit brennande ynskje om plass i Sykkylven kommunestyre må han løfte seg
fagleg. Han startar i Tromsø med studiar og eksamen. Får han ikkje 5 der, må
han vidare til Bodø. Same prosedyre der. Får han 4 eller svakare til
eksamen vert Trondheim neste stogg.
Dersom NN ikkje har fått 5 i samfunnsfag etter å ha vore innom alle tolv byane
i opplegget, vert vedkomande teken hand om av sensornemnda».

Der sit Sylvi Listhaug, Per Olaf Lundteigen og Torvald
Stoltenberg.
  VIL-Nett har hatt ein
prat med Sylvi Listhaug etter oppmoding frå Odd Jostein Drotninghaug.

 
 -  Kva skjer med
denne NN om han ikkje maktar 5 i samfunnsfag i nokon av byane.

 
 -  Då vert
vedkomande sendt ut.

 
 -  Ut av landet..??

 
 -  Nei, sjølvsagt
ikkje – ut av politikken.

Ordførar Drotninghaug er ikkje nådig.

 
 -  Nær-kunnskap meg
her, og nær-kunnskap meg der, seier han nedlatande. Håper dette skal gjelde
også for rikspolitikarane.

Andre VIL-Nett har snakka
med er langt meir positive:

 
 -  Dette var på høg tid!
  Faktisk noko eg har venta på,
  seier AP sin Hans Petter Sørensen. Skal lærarar ha fire i
matematikk, er det eit rimeleg krav at lokalpolitikarar skal ha fem i
samfunnsfag, seier Sørensen.

 
 -  Har du kravet alt
inne?

 
 -  He,he – kanskje det

Høgre-politikar Petter Lyshol blæs i nase av heile
forslaget:

 
 -  Eg kan her og no
melde min avgang. Den tida eg dreiv med fotballdømming vanka det nokre 5-arar,
men her er det tydeleg at nokon manglar sunt bondevit. Personleg kjem eg i
neste fireårsbolk til å bruke all mi fritid på kyllingproduksjon på Lyshol.
Frittgåande kylling, så naboane er med dette åtvara.

Ordførar Drotninghaug
fryktar det noverande kommunestyret kjem til å «smuldre» opp.

 
 -  Dette kan vere
ein farleg veg å gå. Korleis vil det gå med den nye sentrumsskulen om
kommunestyret vert fylt opp av «kunnskapsbroilarar» over heile lina…?

 
 -  Ja, kva trur
ordføraren om det?

 
 -  Då kan skulen
fort gjort hamne oppe på Slettegjerde, uti Øggardsvikja eller inni Ramstaddalen.
Det florerer med rimelege tomter i utkantane. Og kjem Sp til meir makt kan
skulen fort gjort hamne høgt og fritt på Myrdalen. Folk med 6 i samfunnsfag går
for det, har eg høyrt. Der kan det på sikt slåast saman med Stranda.