Konradkrus + Skodjekvinne = Facebookrekord!
Postet av Velledalen Idrettslag den 9. Jun 2015
Fråv.: ?, Elise Stette, Kari-Anne Tryggestad Ryste
La oss innrømme det fyrst
som sist: Velledalen IL har ein «likes-topp». Kvart år har laget ei topp-5
rangering over dei sakene som har fått flest «likes» siste året. I 2014 vann
saka om at Sykkylven hadde fått sin fyrste Konrad på mange, mange tiår. Saka
frå dåpen til Konrad Strømmegjerde Helle sundag 19.oktober 2014 – som kosta
Velledalen IL 3000 kroner – vart løna av folket med 61 «likes». Altså mest i
2014!
På denne bakgrunn var vi
strålande nøgde då vi noterte 87 «likes» av tilhengarane for 79. plass av 1698
fullførande lag i Holmenkollstafetten i klassa som heiter: miksa lag med
fleirtal menn.
6.juni reiste så to menn
og to Konrad-krus frå VIL til Geiranger i von om å få tilgjeving for eit snev
av tidlegdemens. To krus, tinga av Elise Stette, etter Konradløpet i 2014 sat
vi på framleis. Vi hadde dei i bilen. Problemet var at vi ikkje visste kven ho
var. Men, haha, vi visste startnummeret.
Vi såg «offeret» fyrste
gong ved passering fire kilometer. Då stod vi utanfor Utsikten, men hadde ikkje
krusa for hand. Difor sa vi ingenting, men gliste til kvarandre i triumf over
at vi hadde funne ho i mylderet av deltakarar. Men etter ganske nøyaktig
halvgått løp, då somme utøvarar byrjar få vonde tankar, eksempelvis om å bryte
ved Djupvasshytta, då hadde vi eit krus i handa og gav henne klar beskjed på
kort hald om at i dag var den store dagen komen. Og ho var ikkje meir i ørska
enn at ho oppfatta – ho smilte nemleg.
Alle kvinner i sin beste
alder ville fått ein ny kveik og livsgnist av ein slik tildragelse. Også Elise.
Det viser sluttida, 3.10.34, mot 3.15.41 i 2014. Ny personleg rekord med fem
minutt og sju sekund.
Men det store SJOKKET kom
dagen etter, då saka vart lagt ut på facebook-sida vår. I skrivande stund 257 «likes»!!!
Hadde vi vore heilt utrena, kunne vi beint fram ha døydd av heile greia. At det
var slik kraft i to Konrad-krus og ei Skodje-kvinne, ja, det hadde vi ikkje i
vår villaste fantasi trudd.
Takk til alle som lika
saka!!