Hopphelsing til Ove, Solbjørg og andre slektningar
Postet av Velledalen Idrettslag den 7. Feb 2010
Born frå Sykkylven med hoppski er sjeldan vare. I går traff nettsida i det minste to halve sykkylvingar som dyrka denne flotte sporten.
Håvard og Øyvind Straumsheim bur i Molde og representerer MOI. Faren, Jens, kjem frå Straumgjerde. Der bur òg tyngda av slekta på farssida. Laurdag var dei to gutane på plass på Stavsengfjellet,
mellom kring 40 hopparar i Stordalsrennet.
Håvard, i klasse G 9 år, hoppa i bakken med K-punkt 18 meter. Han var svært jamn i sine tre hopp som målte 13 – 13,5 og 14 meter.
-
Det gjekk bra med hoppinga i dag. Persen min er på 18,5 meter, sa Håvard etter rennslutt.
Storebror Øyvind (G 12 år) hoppa i bakken med K-punkt 30 meter. I tillegg var han prøvehoppar i 50 meters bakken. I rennet strekte Øyvind seg godt ned på 20-talet med upåklageleg stil. I 50 meters bakken hoppa han vesentleg lenger.
Vi traff dei to karane att på ferga mellom Liabygda og Stranda etter rent, på veg til tantebesøk i Hornindal. Om kvelden skulle dei på UKM-mønstring i Stryn. Håvard hadde då ei viktig melding til mannen som hadde intervjua han og til slekt og vener elles.
-Veit du, etter rennet sette eg ny pers. Då hoppa eg 20 meter, sa guten gledesstrålande.
Så alle slektningar; send gratulasjonar til Håvard!” Kanskje vankar det ein aldri så liten bonus frå bestefar Ove – kven veit …?
20 meter er ei stor barriere å bryte for ein liten gutekropp – hugs det!