Elisabeth og Ellen persa mest av kvinnene

Begge med personleg framgang som vert lagt merke til.

Fattige 13 dagar før Oslo Maraton leverte Elisabeth Hetlevik 1.49.05, i det ho sjølv kalla ei flat, kjedeleg løype i Drammen. Tida heldt til ein finfin 8.plass i klasse K 60-64.

Men Elisabeth likte løypa i Oslo mykje betre, ei løype med svingar og bakkar både opp- og nedover. Den nye personleg rekorden vart pressa ned til 1.45.31- plasseringa vart nummer fire! Og berre for å ha nemnt det; Elisabeth hadde tredje beste strekktid i klasse K 60-64 på dei tre siste strekka. Som gjer at VIL-Nett trur ho har meir inne.

Ellen Marie Hole gjekk inn i 2024-sesongen med ei bestetid på 44.05 på 10 km. I Hornindal persa ho til 43.22. Ei tid som fekk krafig medfart i Oslo der ho kryssa mållina på 41.24. Med den tida slo ho over 1100 løparar i klasse K 24-34. Einaste som gnog litt etter løpet var at Bjørn Arve slo henne med tre sekund, sjølv om han opererte bak henne heile løpet. Bjørn Arve er ein smart løpar. Han kryssa startlina fleire sekund etter Ellen, og var tre sekund nærare henne (men framleis bak) då han kryssa mållina. Så utan at Ellen hadde sett snurten av han under løpet, fekk han revansje på henne frå duellen i Hornindal.

PS. Det kjem ein tredje – og avgjerande - duell mellom Bjørn Arve og Ellen under Hytteplanmila i oktober.