Grethe Helen nådde målet sitt under Hytteplanmila

Sprang heile vegen og vart nummer 67 i klasse K 50-54 år.

Grethe Helen Tynes er ein tøffing. På idrettsfronten er ho ikkje mest kjend for ei løpskarriere, men heller som ein særs solid handball-spelar. Men ho spring når ho må. Såleis står ho bokført med fem Konradløp i Lars Inge Sæther sin statistikk. Ho er med andre ord kvalifisert til Konrad-medaljen i gull, om ho stiller til start i 2025.

Grethe Helen sine tre siste Konradløp har hatt denne utviklinga:

2022: Tid 27.53

2023: Tid 24.54

2024: Tid 21.51

Og det skal seiast at «kjella» vart ein smule stolt då det stod på nettsida til Velledalen IL at ei slik utvikling, ja, det var som å bli eit nytt menneske!

NM-debutant

Korleis Grethe Helen vart påmeld til Hytteplanmila 2024 veit vi ikkje sikkert. Det kunne vere både av gode vener, eller dårlege kameratar. Eller kanskje gjorde ho det sjølv…. I alle fall, har vi kjelder som seier at det var fyrst under frukosten på eit hotell i Hønefoss sentrum løpsdagen, at ho vart klar over at ho også var påmeld i NM gateløp. Og då var det «mestå so ho vart ovel», for å bruke ei setning frå vår gode ven, John Holmberg. I alle fall: No var gode råd dyre, for Grethe Helen! Men det skal seiast at ho framleis var ved godt mot då vi møtte henne i ein idrettshall der det vart servert «berolegande» bollar og kaffi (begge deler gratis) to timar før start.

Realistiske mål:

I denne idrettshallen fortalde ho at når ho fyrst var komen i eit uføre, var det berre å gjere det beste ut av det. Målet var todelt: Ei tid under timen, og å springe heile vegen. Ute i løypa såg eg henne etter kring ni kilometer. Eg veit ikkje om ho såg meg. Eg veit korleis det er. Når ein gir alt i kondisjonsidrettar, er det som ei skodde dimmar synet. Og denne dagen var det i tillegg naturleg skodde, litt yr i lufta og kring 10 plussgrader. Men ho sprang. Med Velledalen IL si trøye på overkroppen. Ei lånt herretrøye, til og med. Og eit godt stykke bak henne kom fartshaldaren til 60 minutt. Då skjøna eg at ho ville klare tidsmålet sitt. Eg vart lukkeleg på hennar vegne. Sjølv om siste motbakken på 200 meter både er bratt og brutal, kjempa Grethe Helen seg opp, utan å sjalte ned. Truleg kvelte ho nesten «motoren» på slutten av bakken. Men opp kom ho, og fekk kryssa denne hersens mållina, som det er så mykje snakk om. Arrangøren sine klokker stogga på 58.24. Nummer 67 av 100 fullførande i klasse K 50-54.

Ein dag å vere stolt av, for Grethe Helen Tynes – og Velledalen IL, som har slike flotte representantar i rekkjene sine!