Jan Arne Lade fyller 80 år 3.desember

Velledalen IL gratulerer mannen som var formann i laget i 1970 med den store dagen!

30. november 1969 heldt Velledalen IL årsmøte i Velledalen skule. Formanns-jobben fall på Jan Arne Lade, ein kar som mangla tre dagar på 25 år den gongen. Med seg i Styret fekk han Johan S. Grebstad (kasserar), Karl B Lade, Reidar Bremerthun og John Brandshaug. Som varamenn til hovudstyret vart Kaspar Fet og Rolf Lødøen valde.

       Ved årsmøtet seinhausten 1969 hadde Velledalen IL fire undergrupper. Det var HOPP (tre menn i styret), LANGRENN (tre menn i styret), ALPINT (tre menn i styret) og FRIIDRETT (tre menn i styret). Ikkje ei einaste kvinne fekk plass noko stad – dette var altså året 1969.

Frå dette årsmøtet heiter det vidare: «Årsmøtet noterte seg aukande interesse for fjellsporten i det breie lag», og det vart bestemt at frå 1971 skulle medlemskontingenten vere 5 kroner for born, 10 kroner for vaksne. Det største som hende året Jan Lade sat som formann i Velledalen IL var at grasbana på Dalemyra vart sådd. Den vart opna sommaren 1971 etter ei anleggstid på ikkje mindre enn ti år (1961-1971). Ved opninga med stor fotball-turnering sommaren 1971(VRF slo Hødd 1-0 i finalen) hadde Karl B. Lade overteke formannsklubba etter Jan.

Av yrke er Jan interiørarkitekt og møbeldesignar. Hans største bidrag til design-historia er utviklinga og vidareutviklinga av Stressless-konseptet, står det å lese i Store norske leksikon. Jan har i alle år vore ein god og viktig mann for Velledalen sitt ve og vel. Mange vil i tillegg kjenne han som ein solid bidragsytar i Blue Horn. Trompeten hans har enno god klang. Han har gjennom åra halde seg i god fysisk form gjennom ei rad fjellturar. På sine eldre dagar frekventerer han frå tid til anna Velledalen IL sine trimpostar. Og han var mellom dei som leverte sitt «Idrettsminne» då Velledalen IL bad om det i samband med 100 års jubileumet i 2006. Kos dykk med Jan sitt «Idrettsminne»

Idrettsminne: 

 https://il-velledalen.idrettenonline.no/old/storage/Preview?id=5a522428-e539-4df9-9f4a-cc53675d0823

https://il-velledalen.idrettenonline.no/old/storage/Preview?id=bc9bccaa-96c9-485a-9491-ea4c1bc0a9d5

https://il-velledalen.idrettenonline.no/old/storage/Preview?id=ba4b7c8b-69fb-430b-bcb5-729fac3f2800

Velledalen IL gratulerer ein sann velledalspatriot med 80 års dagen!