Meir Idrettsgalla: «Uføre-prisen» til Grethe Helen

Trudde ho var påmeld til Hytteplanmila, men det fylgde meir med denne turen.

Velledalen IL hadde ein stor tropp påmeld til Hytteplanmila ved Hønefoss i 2024. Ei av dei påmelde var Grethe Helen Tynes. Hytteplanmila er eit sjølvstendig landevegsløp på 10 km, men nytt av året var at NM 10 km landevegsløp var lagt inn i løpet – for dei som ville. Fyrst under frukosten på eit hotell i Hønefoss løpsdagen, vart Grethe Helen klar over at «i dag skulle ho debutere i NM landevegsløp» Og det er ikkje å undrast over at «det var mestå so ho vart ovel» for å bruke ei av John Holmberg sine mest kjende fraser. Sykkylvskvinna var heilt klart komen i eit uføre.

Vi møtte henne løpsdagen i ein sprengfull idrettshall der det vart servert gratis bollar og kaffi. Det var to timar til start. Ho vedgjekk at dette kom brått på. Uføre eller ikkje, ho ville gjere det beste ut av det, og røpa at målet var todelt: 1. Springe heile vegen. 2. Kome under timen.

Slik skildra VIL-Nettsida siste kilometeren i løpet:

• Ute i løypa såg eg henne etter ni kilometer. Uvisst om ho såg meg. Det er så rart med det. Når ein gir alt i kondisjonsidrettar, er det som ei skodde dimmar synet. Og denne dagen vart det i tillegg naturleg skodde, litt yr i lufta og kring 10 plussgrader. Men ho sprang. Med Velledalen IL si trøye på overkroppen. Ei lånt herretrøye til og med. Eit godt stykke bak henne kom fartshaldaren til 60 minutt. Då skjøna eg ho ville klare tidsmålet sitt. Eg vart lukkeleg på hennar vegne. Sjølv om siste motbakken er både bratt og brutal, kjempa Grethe Helen seg opp. Utan å sjalte ned, i fylgje augevitne. Opp kom ho, og fekk kryssa denne hersens mållina, som det er så mykje snakk om. Arrangøren sine klokker stogga på 58.24. Nummer 67 av 100 fullførande i klasse K 50-54. Nummer 14 i NM. Ein prestasjon å vere STOLT av!

Ein fortent og populær pris til Grethe Helen Tynes.