«Gjenreisings-prisen» til Per Inge Bjørnestad

arkivfoto
Vi er i Sandane i Gloppen kommune i Nordfjord. Tidleg i oktober 2020. Under Gloppen Halvmaraton.
 -  Her kjem ein som treng litt ekstra applaus, seier speakeren, om mannen han ser vert støtta opp av Velledalen IL sin friidrettsleiar, Alf Petter Bøe, og arrangøren sitt eige helsepersonell.

Det er Per Inge Bjørnestad som kryssar mållina på denne måten. Heilt i ørska, til dagens største fagnad frå publikum. Etter litt vert han frakta til den lokale sjukestova. Der kjem han til hektene og diagnosen lyder: Raskt blodsukkerfall.

Alt under Nyttårsmaraton same år var Per Inge tilbake på normalt nivå. Siger i klasse 45-49 år på halvmaraton på 1.22.51. I 2021 gjekk det slag i slag med gjennomgåande fine prestasjonar. I oktober reiste han tilbake til Gloppen. Denne gongen kryssa han mållina for eiga maskin til gode minne : 1.23.00 på halvmaraton. 3.plass av 14 fullførande i klassa. Gjenreisingsåret var fullenda – same stad han eitt år tidlegare kollapsa.

 -  Godt jobba Per Inge – slik innstilling fortener heilt klart ein pris, meiner juryen i Velledalen IL

«Gjenreisingsprisen» for 2021 går til veteran-løpar Per Inge Bjørnestad