Jonny Mauren «Årets Krafthoppar» i Velledalen IL

På 1960-talet dreiv mest alle gutar i Velledalen med skihopp i ei eller anna form. Så kom vi til 1969/1970. Då kom det skitrekk i Ladalen. Nærast over natta var hoppsporten utkonkurrert av alpint.

   Men nokre få heldt det gåande. Mellom dei Jan Ringseth og Arnt Cato Eidem i Sykkylven IL. Men då fotballen i Sykkylven IL «kibba» friidretten ut av Sykkylven stadion, var hopparen Jan Ringseth mellom dei som melde overgang til Velledalen IL.

Der var Jan lenge einsleg hoppar. Med ei rad vetran-VM og medaljar i høge årsklasser som årlege høgdepunkt. Jan heldt på lenge. Til langt opp i 70-åra, og heilt til han fekk oppleve at ein ny, ung hoppar byrja hoppe for Velledalen IL. Med dei nye plastbakkane i Spjelkavik som treningsarena. Hopparen vår, Jonny Mauren, har vorte 13 år. Han tek nye steg kvart år. Sist haust nådde han 40 meter under trenings-samlinga i Knyken.

Vi minner igjen om at lengste skihopp ein utøvar som har representert Velledalen IL har gjort under konkurranse, er 53 meter. Magnar Fet i Hornindal i 1949. Vi kan ikkje skryte av at unggutane står i kø for å slå rekorden hans. For tida har vi berre eitt håp – og det er Jonny.
Jonny Mauren. Busett i Ålesund og vinnar av prisen «Årets Krafthoppar» i Velledalen IL i 2021.

Gratulerer til Jonny!
Og stor takk til Jan Ringseth for hans fantastiske bidrag for det samla, vesle hoppmiljøet på Sunnmøre!