Kring 60 deltok på trimbingo til Myrdalen

Turen frå Lade (eller
Hole) gjekk lett med bingolapp i handa. Sju plakatar på den knappe tre
kilometer lange strekninga fortalde vinnartala. At mange vann var også
populært.

På Myrdalsstølen venta
trimgruppa med saft, kaffi eller brus. Grillen var framme, slik at ei pølse med
brød glei lett ned. Eller ein kunne velje velsmakande sveler eller skuffekake
frå ein akkurat høveleg stor meny. Dei vaksne slo av ein prat med sidemannen,
borna fann fort ut at stølen eigna seg for leik.

Vêret var lageleg, sjølv
om det akkurat oppe på stølen var ein litt lei vindtrekk. Den merka vi best då
vi var på heimveg og komen 50 meter ned i lia nedom stølen. Der var vindstille
og ein heilt annan og høgare temperatur.

Alt i alt eit vellukka
arrangement i regi trimgruppa, av ein type det gjerne kan vere fleire av i
løpet av året.

PS – tips til trimgruppa

Sundagane om haustane kan
ein sjå enorme mengder hyttefolk gå tur i Ladalen. Kva med å gi desse eit
tilbod gjennom ein trimbingo - i september eller tidleg oktober……?