Stor idrettslaurdag i Velledalen IL 11.mai.

Arkivfoto
Våre to elite-utøvarar i Toughest
ORC-hinderløp, Anette H. Jokstad og Nikolai Handle Jensen er på plass i Malmø.
Alt klokka 09.00 startar eliteklassa for herrar med Nikolai i feltet. Endeleg
skal lang tid med trening omsettast i resultat gjennom beinhard konkurranse. Vi
er godt nøgde om Nikolai greier ei topp-25 plassering i sesongdebuten.

09.05 startar Anette. Ho
opna sesongen svært lovande i 2018, men drog tidleg på seg ein alvorleg skade
som sette henne utanfor i lang tid. Trass eit langt konkurranse-avbrot trur vi
Anette kan greie ei topp-10 plassering i Malmø. Og Velledalen IL er særdeles
stolte over å ha klubb-logoen på Anette og Nikolai sine vestar. Masse lukke til i Malmø!

Klokka 12.00 går starten
for halvmaraton i Ålesund. Frode Mauren gjorde 1.30.25 på distansen i vinter,
som fersk utøvar på distansen. Denne gongen trur vi han kjem under 1.30. Vi
legg inn eit råtips på 1.28.45 på Frode, som spring i klasse 45-49 år.

Andreas Mosby Nakken (16)
har hatt enorm framgang siste året. Halvmaraton er langt, men han greidde målet
på to timar i vinter, då han kom inn på 1.57.20. Sjølv om Andreas nyleg har
vore sjuk, trur vi han fleskar til med 1.51.39 denne gongen.

Olaf Einar Øien er
superveteran, i klasse 75+. I ein så vaksen alder er det tøft gjort berre å
stille til start. Olaf treng nok over to timar på turen denne gongen. VIL-Nett
tippar 2.19.19 på Olaf i Ålesund, som betyr at han er i mål i god tid før
Holmenkollstafett-laget vårt legg i veg i Oslo.

Det gjer dei laurdag
11.mai klokka 14.55 med Ingrid Ragnarsøn på startetappen. På dei neste etappane
spring: Lisbeth Elvebakk – Håkon Fedt – Anders Wigdahl – Sverre Gunnar Brunstad
– Oskar Johan K. Hole – Kjell Magnar Berli – Njål Torillson Tyssing – Ellen Marie
Hole – Øistein Olsen – Alf Petter Bøe – Ole-Peder Kristian Holmberg – Henning Tandstad
– Roger Malvin Hole – Selma Hole Strømsnes. Velledalen IL stiller i klasse A1, som er
miksa lag med fleirtal menn. VIL sitt lag har fire kvinner og elleve menn, og
er venta i mål ganske nær klokka 16.00 Hovudmålet er å greie premiekravet på
1.12.00, melder friidrettsleiar Alf Petter Bøe i Henning Tandstad sin bil frå
Fåvang.

Altså 20 utøvarar i aksjon
for Velledalen IL i morgon, laurdag 11.mai.

Hald deg oppdatert på
VIL-Nett gjennom helga!