VIL-bygdameister frå 1951 fyller 90 år

I dag er det ein VIL-pioner som fyller år. Heile 90 år!
 Margit Fet vart nemleg Velledalen IL sin fyrste
kvinnelege bygdameister i alpint – året var 1951. Dette var tidleg i kula for
alpinsporten, som verkeleg fekk vind i segla då arbeidet med skitrekket i Ladalen
tok til i 1969.

Margit vart seinare gift
med Magnar Fet. Han var ein allsidig idrettsmann (alpint, hopp, fotball og
løp/stafettar), og vart seinare æresmedlem i Velledalen IL. At borna til Margit
og Magnar også vart flinke alpinistar (og meir til) låg liksom i korta.

Elles har Margit vore
trufast deltakar på trimposten i skogsvegen Fet. Seinast i sesongen 2018 var ho
inne på topp – 5. Høgst respektabelt av ein 89-åring!! Og vi må heller ikkje gløyme alle kakene
Margit har laga til Velledalen IL opp gjennom åra – dei er mange, og gode har
dei vore på smak!

Men altså: Denne vinteren er
det 68 år sidan Margit Fet, som 22-åring, vart bygdameister i slalåm. I ei tid
der jenteidretten langt frå hadde nokon framskoten plass i samfunnet. Difor
fortener Margit ein ekstra hyllest på 90 års dagen sin, 16. april 2019.

Velledalen IL gratulerer Margit med 90 års dagen!!