Minneord Fridtjof Drabløs

Fridtjof Drabløs vart fødd
15. januar 1919. Fridtjof vart ein kar som skulle kome til å markere seg både
sportsleg og administrativt i Velledalen IL.

 Idrettane hans vart
skisport (langrenn) og springing, særleg stafettar. Lang som han var, hadde han
eit godt steg når den fysiske forma var der. Og Velledalen IL hadde eit sterkt
stafettlag i åra etter andre verdskrig.

 Tidleg på 1950-talet sat
Fridtjof som leiar i VIL sitt hovudstyre. Han hadde òg verv i skistyret, og var
mykje nytta som funksjonær i samband med skirenn.

 Men aller best vert han
kanskje hugsa for dei to storrenna i hopp i Brunstadbakken på 1960-talet. Då
var Fridtjof mellom dei sentrale personane som skaffa overdådige premiar til
 
 renna. Premiar som gjorde at nasjonale einarar
i hopp og kombinert fann vegen
 
 til bygda.

Verdsmeister i kombinert,
Arne Larsen, i 1962, og Hans Olav Sørensen, Johan Flytør, Ingolf Mork, Jan Olaf
Roaldseth og Hans Jørgen Næss med fleire i 1965. Siste året fekk vinnaren
(Johan Flytør) «et komplett soveværelse-møblement» i premie, stod det å lese i Sunnmøre Arbeideravis.

 Fridtjof Drabløs vart
utnemnd til æresmedlem i Velledalen IL i 2001, saman med karar som Magnar Fet,
Kaspar Fet og Karl B. Lade.
 
 Sjølv om han
ikkje i alle år har vore like aktiv, har han heile tida vore oppteken av laget
sitt ve og vel, og kva vi tuska med av aktivitet.

 Då Velledalen IL markerte
at laget var 100 år (2006), hadde Fridtjof passert 87 år. Med andre ord ingen
ungdom, men det hindra han ikkje tenkje konstruktive tankar. Det var nemleg
Fridtjof Drabløs som den gongen gjekk i bresjen for innsamlinga som gav
hjartestartar i Velledalen grendahus.

 31.mai sovna Fridtjof
stille inn i ein alder av 97 år. Velledalen IL lyser fred over æresmedlem Fridtjof
Drabløs sitt gode minne.

PS. Vi oppmodar lagsmedlemar
til å ta del i gravferda – Sykkylven kyrkje tysdag 7. juni klokka 13.00