Ei glede å kunne hylle ordføraren

Veit nokon om ordføraren er på «slankaren»……?
  Eigentleg vedkjem det ingen, men det er ein grunn til
at nettsida til Velledalen IL spør:

17.mai 2015 heldt Odd
Jostein 17.mai-tale i Velledalen. Honoraret var skrint. Han fekk ei
Konradløp-skjorte, for å minne han om at:
  dersom
han vart ordførar var det nærast hans plikt å
  gjere sitt for å slette Jan Kåre
Aurdal sin «Ordførar-rekord» i Konradløpet, pålydande 30.52,
  sett i 2003.

No er ikkje Odd Jostein
kjend for å dele sine innerste kjensler med Gud og kvar mann. Forresten,
kanskje med Gud, men ikkje kvar mann. Kva han no tenkjer om dette Konradløpet,
er ikkje godt å vite. Kanskje ligg det der og gneg som ei mare, og det er faktisk
berre 90 døgn å gjere det på. Og det var difor vi spurde. Er ordføraren på «slankaren»……betyr
det kanskje at han tek oppgåva sjølv. Eller han kan overføre den til varaordføraren.
Ho skal ha sitt å sysle med ho også. Rett nok er ho ti år eldre, men slank og
veltrena, og attpåtil med Nakken som jentenamn. Kjenner vi Odd rett er
haldninga:
   det
  viktigaste er at «regimet» tek rekorden.

Her i Velledalen er vi
ikkje ottesame for dette. Odd er realist. Han har «ordførarrekordtempoet» inne.
Kanskje rettare sagt hadde det inne, etter som han noterte tida 31.21 i 2006.
Mindre enn halvminuttet bak rekorden, men dette var før det «løsna» for alvor i
politikken. Og han kjenner løypa. I fylgje statistikken har han delteke fem
gonger tidlegare. Som betyr Konradmedaljen i gull 1.mai 2016. Den vert han
åleine om. Den har ingen andre ordførarar i heile verda!

Odd Jostein Drotninghaug
og Svein Arne Nakken har vore saman om mykje her i verda. Dei vart produserte
og fødde nær sagt samstundes, gått på skule i lag, og hatt felles
fritidssyslar. Som det gjekk fram av Svein sitt idrettsminne var begge
langrennsløparar. Og begge brukte tyngda av fritida si gjennom mange år på VRF.
Men fotballen vart også det som skilde dei.

Fotball-fusjonen som
skulle løfte sykkylvsfotballen mot nye høgder i 2002, fall ikkje i smak hjå
Gyls-bonden. Han rett og slett trappa ned lokal fotball, og trappa Hødd opp, medan
Odd Jostein måtte ta «pliktåra» sine – og vel så det – også i den nye klubben.

Svein Arne og Odd Jostein
har vore gode menn for nærmiljøet sitt. Også for Velledalen og Velledalen IL.
Det er ei glede å kunne hylle Odd på 50 års dagen 29.januar.
  Gratulerer og vit
  at vi set pris på ein ordførar som vil utkantane vel ! Og når det
gjeld Konradløpet: Ta det med knusande ro, mottoet er trass alt:
  Løpet – der farta ikkje er det viktigaste

Atle