Den «gløymde» trimposten

Trimgruppa i Velledalen IL
har 14 postar i drift. Ikkje alle er like flittig besøkt og mellom dei mest
einsame postane er Høgsætra på Fet. I 2012 kom denne posten så vidt føre
Holetindane på statistikken, men vurdert ut frå lengde og vanskegrad er det
ikkje tvil om kva som var botnposten.

Ein meldar som nyleg var
på Høgsætra rapporterte om svakt besøk hittil i 2013. Trimgruppa har
kontinuerleg ei vurdering av dei ulike postane. Som vi hugsar vart posten i
skogsvegen på Drabløs lagt ned eit par sesongar på grunn av dårlege forhold og
attgroing. Dette vart det ordna opp i, og posten kom tilbake. Stadig kjem det
ynskjer om nye postar inn. I så fall er det dei svakaste som må vike.

Vi skal ikkje forskottere
trimgruppa sine gjerningar. Men sikkert er det at ein tur til Høgsætra denne
sommaren aukar sjansen for posten sin eksistens.

God tur!