Gratulerer Terje!

Velledalen IL
har mange medlemar utanom Velledalen. Ein av dei med klart lengst fartstid er
Terje Aurdal, ein kar som har markert seg på ymse positive måtar i laget vårt.
Kanskje i større grad enn dei fleste veit.

Terje har i
alle år sysla med idrett. Hovudsakleg langrenn og springing. Terje Aurdal var
den store pådrivaren då Velledalen IL i fem år hadde herrelag – og damelag i
tre eller to - i Holmenkollstafetten i Oslo. Dette var i fyrste halvdel av
1980-åra, og det var ikkje så reint lite organisering som skulle gjerast for at
alt skulle klaffe. Terje tok dei tyngste børene i så måte, og alle kom
heilskinna heim med gode minne kvar gong. Og bestetida til herrelaget var høgst
respektable 54.42.

Størstedelen
av tida som aktiv representerte Terje Sykkylven IL. Men midt på 1980-talet
hoppa han over til Velledalen IL. Det gav klubben KM-tittel over 3x10 km
stafett i Ørsta i 1985, 33 år etter Jon C. Brunstad, Ole L, Paul og Olav P.
Hole hadde gjort like eins i same kommune (1952). I 1986, hans siste sesong som
seriøstsatsande, vann Terje KM-tittel over 15 km i seniorklassa på Vatne. Berre
ein mann før han i Velledalen IL si 107-årige soge har vunne eit senior-KM i
individuelt langrenn i herreklassa, nemleg Olav P. Hole i 1951. Eit fall ned ei
kjellartrapp gjorde at han ikkje fekk stille då klubben skulle gjere det heilt
store i stafetten om fylkesmeisterskapet, men det må seiast at reserven Bård
Erstad var ein god erstattar.

Terje Aurdal
kjempa hardt som friidrettsleiar i SIL for og behalde friidretten på Sykkylven
stadion. Denne kampen tapte han. Sidan den gongen har Terje vore vår mann, og
mange i gruppa hans og miljøet rundt han fylgde i same spora. Tradisjonsrike
Sykkylven Halvmaraton enda óg sine dagar i etterkant av denne hendinga.

Terje har mang
ein gong tromma saman lag til «Stafetten for alle» i Lom-traktene. Her lokalt
har han hatt godhug for prosjektet «Sykkylven Rundt». Det vart eit prøveår i
2009, før ein satsar med nytt konsept og ny giv den 7. september i 2013

Terje har
elles vore bygda Sykkylven sin føregangsmann på langløp i utlandet. Han var den
fyrste som gjekk Vasaloppet, og han har vore pioner i ei rekkje andre land, no
sist vinter i Finland.

Terje Sigbjørn
Aurdal har Konradmedaljen i gull!

PS. Terje har
førebels ikkje levert idrettsminne til Velledalen IL (enno ikkje for seint). Vi
tek med eit anna idrettsminne som skildrar litt av livet kring ei deltaking i
Holmenkollstafetten på 1980-talet.

GRATULERER med
jubileumet, Terje!

På vegne av
idrettsvener i Velledalen IL

Atle Hole

 Idrettsminne finn du her