Kvileår på Nordmøre

Hilde Riksheim Tandstad vann Fetvatnet Rundt, men elles har det vore stille kring friidrettsjenta vår denne sesongen.

Det har sine naturlege grunnar. I vår avslutta ho skulegangen ved Sykkylven vidaregåande skule. I tillegg til eksamenspress, hadde pliktoppfyllande Hilde tid både til russerevy og russeavis.

Dette hardkøyret var ei medverkande årsak til at det vart nedtrapping i friidretten. I tillegg har Simo-Hilde hatt sin del av skadar, så ei pause var kanskje det beste.

Medan Hilde vurderer kva retning ho skal slå inn på i framtida, har ho skaffa seg jobb på Nordmøre – i sportsforretning. Hilde gjekk fyrste året i vidaregåande på Tingvoll (med Magne Wullum som trenar), og har sine kontakter i denne landsdelen. Meir er ikkje å seie om den saka.

Så langt har Hilde teke fire KM-titlar for Velledalen IL i friidrett. Med det er ho èin tittel bak Ann Kristin Fet som har flest gjennom alle tider med fem (alpint). I 2009 vann Hilde 800 meter innandør og 7-kamp. I 2010 vart det nye titlar på distansane 400 og 800 meter utandørs.

Hilde sine personlege frå 2010-sesongen, med plassering på fylkesnivå i parantes

400 meter: 63.60 (6. plass)

600 meter: 1.48.30 (4. plass)

800 meter: 2.25.36 (2.plass)

1500 meter: 5.07.53 (2.plass)

3000 meter: 11.15.30 (3.plass).

I tillegg har ho damerekorden i Konradløpet med 18.46, ei tid ho for øvrig har notert to gonger.