Æresmedlem Johan S. Grebstad 70 år i dag

Postet av Velledalen Idrettslag den 6. Jan 2011

Velledalen IL har æresmedlemar både på 90-talet og 80-talet når det gjeld alder. I dag fekk vi endeleg ein på 70-talet.

Johan S. Grebstad kom med i VIL alt i ung alder. Opp gjennom åra har han hatt dei aller fleste verv i laget. Sportsleg dreiv han det ikkje langt i VIL-regi. Det var fotballen som låg hjartet hans nærast. Gjennom stort sett heile 60-talet var han ein stødig forsvarsspelar på VRF sitt A-lag. Posisjonen var back eller midtstoppar. Kjennemerket hans på fotballbana var stupheadinga. Det var ingen god kamp om ikkje Johan S gjorde minst ei slik i løpet av 2x45 minutt.

I 1971 vart grasbana på Dalemyra opna. Bana var VIL sin eigedom, men vart utleigd til VRF. Då som no trong ei grasbane stell. Og det var i åra etter grasbana kom til at Johans S. Grebstad la ned den innsatsen i VIL som seinare gjorde han til æresmedlem. Fleire år drifta han bana nærast åleine, eller i nært samarbeid med Per Hole Drabløs.

Til slutt tek vi med ei historie om Bolla, frå slutten av 1980-talet.

Då var VRF så dårlege at dei spela seriekamp mot Valldal. Historia skriv seg frå ein haustkamp. Det hadde regna svært mykje i dagane før kampen, så valldalingane hadde stengd grasbana si. Dette passa VRF dårleg. På denne tida hadde VRF fleire unge spelarar som totalt miste livsgnisten berre dei høyrde ordet grus.

Kampen mot Valldal gjekk på ein sundag. Ein god del tilhengarar var med innover, mellom dei Bolla. Då vi kom inn låg grusbana nysloga, merka og klar til kamp.

Som den grasbanekjennar Bolla var, fann han det rett å inspisere grasbana i Valldal. Han fann til og med banemeisteren, og slo av ein prat med han. Praten gjekk om lag slik:

Bolla: Ho ser bra ut grasbanå døkka

Banemeisteren: Ånei, ho e dårleg utpå midta

Bolla: Åh, ej he no spela på långt verre bane enn dinnja her.

Banemeisteren: Det kan no hende, men øss vil no ikkje øydeleggje banå vår.

Bolla: Ha ej haft nøke me dinnja banå her å gjort, ha ej pilara dej vurdert om ej sku tikje å vatna ho.

PS. Kampen enda 1-1. Tor Olav Tandstad scora VRF sitt mål.