Smånytt frå Velledalen IL

Denne helga vert det konkurrert og trena over brei front i Velledalen IL.

Her er litt SMÅNYTT du som lesar kan kose deg med:

• I dag går Olav Brunstad (nyleg 70 år) Stenfjellrunden (42,5 km) som utøvar for Velledalen IL. Rennet har kring 500 deltakarar og tel som seedingsrenn til mellom andre Birken og Vasaloppet. Olav går i klasse M 70-74.
• I dag spring Bjørn Arve Brune og Eldar Sindre Valkvæ siste løpet i vinterkarusellen til Hareid IL. Løpet går rundt Grimstadvatnet og er knappe åtte kilometer langt.
• Jo Andre Tandstad har takka Velledalen IL – og er godt nøgd med - skoa han vann under Velledalen IL sin Idrettsgalla (plukka ut av Espen ved Løplabbet, Bergen) i slutten av desember 24. Jo Andre er godt i gang med treninga, der det er muleg for dei som ynskjer, å fylgje han på trenings-appen Strava fram mot Konradløpet. Truleg kjem det der eit rekordforsøk i vektklasse 100+
• Karar som Njål Torillson Tyssing, Svein Arne Nakken og Fridtjof Fredriksen har no kring 30 dagar på seg til å finne forma. Då går «Knoll og Tott» (Svein og Fridtjof) Vasaloppet, medan Njål spring heilmaraton i Tokyo.
• Espen Utgård Sæther (Årets utøvar på herresida i 2024) er godt i gang med førebuingar til Malaga halvmaraton i mars. Kan persen – og Velledalen IL sin klubbrekord på distansen - på 1.10.03 vere i fare?
• Fire VIL-utøvarar er alt påmelde til Stranda Fjord Trail Race 2025. Det gjeld Ole Martin Korsnes (48 km), Emma Holmberg (25 km), Trond Bonesmo (25 km) og Øystein Bakke (25 km).
• Bursdagar i VIL-miljøet siste dagane: 28. januar vart langrennsgruppeleiar og allsidig utøvar, Svein Arne Nakken, 59 år. Dagen etter, 29.januar, vart tidlegare ordførar, VRF-leiar og guteløpar i langrenn for Velledalen IL, Odd Josten Drotninghaug, 59 år. 30. januar vart Hau-tvillingane, Ove Inge og Kai Roger Skylstad, 65 år. Ove er noverande leiar i Velledalen IL, begge har brei sportsleg bakgrunn frå ei rekkje idrettar. Ove er mellom anna KM-vinnar i lengdehopp utan tilløp, einast Arne Tvervaag kan skryte av det same i Velledalen IL si medlemsmasse gjennom alle tider (119 år).
• Neste laurdag – 8.februar – vert 4.løpet i Ålesund vinterkarusell arrangert i Fremmerholen. Friidrettsleiar Alf Petter melder at der er venta ein stor VIL-tropp i aksjon, i tillegg til at det vert sosial samling for løparar og støtteapparat på Milano (i Spjelkavik) rett etter løpet.
• Nytt helga til ein trimposttur, eller ein skitur! Langrennsleiaren melder om OK forhold med oppkøyrde løyper på Strandafjellet.
• Også Constantin Rust er no påmeld til Birken. Han går for Velledalen IL/Haavind. Dermed sju påmelde frå klubben så langt. Rykta seier Kjell Magnar trenar godt og tel på knappane.
• Oslo-avdelinga er i god trening innan fleire idrettar, mellom anna er «Årets Utøvar» på kvinnesida, Anette Heimli Jokstad, tilbake i godt gjenge. Det har gått rykte om eit innandørsløp på Bislett 7.februar, noko vi kjem tilbake til.