Smånytt – Espen spring halvmaraton i Malaga

Litt om det som skjer i Velledalen IL & omegn i nær framtid

• Sist helg debuterte strandaren, Trine Randen, som maratonløpar i Barcelona. Ho kom inn på den sterke tida 3.43 og vart nummer 2 av 72 i klasse K 60-64. Alf Petter har rekna om tida til senior-nivå, og melder at tida tilsvarar under 2.50 i seniorklassa. Med andre ord krut-sterkt!
• Komande helg spring Espen Utgård Sæther halvmaraton i Malaga. Han har sjølv Velledalen IL sin klubbrekord på distansen på 1.10.03. Normalt sett burde det vere i tidlegaste laget på sesongen til å tukte klubbrekorden, men ein kan aldri vite. Nettsida held deg oppdatert om korleis det går.
• Urszula Gorbacz frå Ikornnes har meldt seg på årets Konradløp. Det betyr at ho som polakk er mellom dei 8 prosentane av dei førebels påmelde som ikkje har norsk opphav. Fullfører Urszula årets løp er ho kvalifisert til Konradmedaljen i sølv (tre deltakingar). Bravo!
• 15.mars vart det trekt ny tidleg påmeldingspremie til årets Konradløp. Trekningsdatoen hadde 37 utøvarar meldt seg på. Vinnar denne gongen vart unge, lovande Olav Klokk. Siste tidleg-premien vert trekt 15. april, då reknar vi med at det nærmar seg 100 påmelde.
• Kjenner nokon Kevin André Skåre Velle..? Det kan høyrest ut som ein velledaling (nedabrauting..?), men vi veit ikkje. Faktum er at karen med dette namnet er mellom dei hittil kring 230 påmelde til Ålesund Maraton tidleg i juni. Og han skal springe heilmaraton, så det er truleg ein relativt sprek kar i klasse M 23-34. Tips oss gjerne om du kjenner mannen.
• Fyrstkomande sundag er det Årsmøte i Velledalen IL. Staden er møterommet i Velledalen grendahus. Vi kjem tilbake med påminning om tidspunket. Enkel servering.
• 27.mars 2025 er det jubileum for eit kulturminne på Brunstad. Brunstadbakken ligg der den låg 27.mars 1965, men er i dag vanskeleg å få auge på.  Dei to hendingane som samla flest tilskodarar i Velledalen på 60-talet var dei to hopprenna i Brunstadbakken, i 1962(då Arne Larsen vann) og altså 27.mars 1965 (minnest du namnet på vinnaren…?) To nolevande sykkylvingar deltok i rennet for 60 år sidan, nemleg Arnold Lyshol, Sykkylven IL og Arnold Bolstad, Velledalen IL. Velledalen IL opplyser om at det neppe vert hopping i bakken under jubileet, sjansen er større for pølser i papir og buljong, akkurat slik det vart servert for 60 år sidan. Og mannen som var ansvarleg for forfriskingar i 1965, han er framleis oppegåande og viril – ingen ringare enn John Holmberg.