Njål Torillson Tyssing 9.19 på 3000 meter

Kvass start på banesesongen av Njål!

Berre tre veker etter eit tøft heilmaraton i Tokyo, der han vart beste nordmann, tok Njål Torillson Tyssing ein formtest på 3000 meter baneløp på Bislett.

• Knappast fullrestituert etter Tokyo, ville Brunstadekspressen (Sverre Gunnar) ha sagt.

Nok om det. Løpet på Bislett er slik at eliten spring for seg, dei litt meir moderate for seg – altså fleire heat tilpassa utøvaren sitt nivå. Njål sprang i det som heitte «mosjon 3». Eit startfelt på 28 utøvarar der Njål vart nummer sju. Men merk, han var BEST av samtlege i klasse M 40-44, med tida 9.19. Vinnar i heatet «mosjon 3» vart Jonas Njerve, Sportsklubben Vidar på tida 9.07. I elite-klassa sprang Ånung Viken, Vollan Idrettsklubb på tida 8.42.

      Njål har sjølv klubbrekorden for Velledalen IL på 3000 meter baneløp. Den lyder på 9.06.52, sett på same arena (Bislett) i 2024.

Njål på Strava: 3000 m Bislett i regi av SK Vidar: 9.19

• Ærlege svar. Greitt nok heile vegen, men blei fullstendig knust på sisterunda i heatet.

PS. Vi minner om at tida til Njål svarar til ei km-tid på 3.06. Vi ventar spent på Alf Petter si omrekning til seniortid.