Brunstadbakken – 27.mars 1965

Etter 15.april 1962 baud ikkje sjansen seg til nytt stor-renn i

Brunstadbakken før 27.mars 1965.

I 1965 sat desse i Velledalen IL sitt hovudstyre (merk: berre menn):

Formann: Olav P. Hole

Kasserar: Johan S. Grebstad

Sekretær: Arvid Henriksen

Styremedlem: John Holmberg

Styremedlem: Jon C. Brunstad

Styret skriv i møteboka til årsmøtet 5.desember 1965:

- Denne årsmeldinga for Velledalen Idrottslag omfattar åra 1964 og 1965. Styret har

hatt seks møte med behandling av mange saker.

Det må nemnast at det heller ikkje vart halde årsmøte i Velledalen IL i 1966 og 1967. Dette i

ei tid der aktiviteten i laget var stor. Grasbana på Dalemyra var under arbeid frå 1961-1971,

garderobebygget (som vart rive då barnehagen vart bygt) var under arbeid, og

Brunstadbakken under kontinuerleg utbetringringar på gang (mest snakk), vart tydelegvis i

meste laget for eit pengelaust idrettslag. I tillegg starta satsinga på barneidrett i 1965, der

Velledalen IL var ganske så tidleg ute.

Men dei kunne når dei ville, noko hopprenna i 1962 og 1965 begge er prov på.

15.mars 1965 klokka 21.00 heldt laget styremøte der funksjonærlista til rennet 27.mars vart

sett opp. Den såg slik ut:

Rennleiar: Jon Hjortdal

Bakkesjef: Alf P. Brunstad

Hoppsjef: Kaspar Fet

Lengdemålarar: Kåre C. Brunstad, Arne Berg-Hansen, Paul Hole, Svein Brudevoll, Fridtjof

Drabløs og Ole C. Brunstad.

Skrivarar: Ole Arnold Hole, Jon P. Brunstad, Norvald Fet og Arne Lade

Startarar: Arne C. Brunstad, Martin Lade, Kåre Hole Drabløs og Åsmund Berge

Herold: Jan Lade

Speaker: Elling Korsbrekke

Hovudkasserar og billettsjef: Johan S. Grebstad

Sjef forfriskningar: John Sverre Holmberg

Trakkarar: Alf Moe, Odd-Kåre Fet, Sigbjørn Fet, Harald Fet, Per Hole-Drabløs, Nils

Ellingvåg, Per Svarstad, Eivind Solheim, Ottar Hole og Kjetil Brunstad

Annonse- og premiekomité: Olav P. Hole og Jon Hjortdal.

Langt fleire var nok i aksjon renndagen, men dette er altså dei som fekk namnet sitt i

møteboka!

Vidare står det dette om rennet i møteboka:

- Rennet skal starte 27.mars 1965 med opprop klokka 14.30, rennstart klokka 15.00.

Startkontingent kr 5,- Det vart bestemt å sende innbyding til alle lag i skikrinsen, samt

Nordfjord og Romsdal. Innmeldingsfristen er sett til onsdag 24.mars klokka 18.00.

Billettprisen blir kr 5,- for vaksne og kr 2,- for born i skulepliktig alder.

Etter rennet i 1962 hadde bakken blitt utgreven nederst i unnarennet. Difor både håpa og

trudde arrangøren på hopp godt over 60 meter. Og dei venta 1500 tilskodarar til bakken

Om deltakinga skreiv Sunnmørsposten nokre dagar før rennet:

- Velledalen IL kan reklamere med sjølvaste vinnaren av den norske hoppveka nyleg,

Hans Olav Sørensen, til storrennet sitt i Brunstadbakken komande laurdag. Dessutan

kjem, som tidlegare nemnt, Arne Larsen, og han har fått med seg solide hopparar

som Johan Flytør og Odd Hammernes, den siste frå Asker.

Merknad VIL-Nett: Odd Hammernes er far til noverande Ekornes-sjef, men diverre vart han

av ukjend grunn programhelt under rennet 27.mars 1965.

Diverre fekk rennet ein dårleg start. Avsnittet under er henta frå Sunnmøre

Arbeideravis:

- Dessverre fikk en et uhell like før rennet skulle starte opp. Junioren Hans Jørgen

Næss tok for god fart under prøvehoppingen, og som den glimrende hopper gutten

fra Fram 1907 er, havnet han på hele 65,5 meter. Det var mere enn bakken tålte. Han

hadde ikke sjanse til å stå. Resultat: Fall og ankelbrudd. En trøstepremie må han få,

mente velledalingene, og ga unge Hans en lenestol.

Johan Flytør vann rennet – skildra slik av Sunnmørsposten:

- Johan Flytør vann rennet etter tre gode hopp på 59 meter, 60 meter og 57 meter

(nedsett fart i 3.omgang). Det fyrste hoppet til Flytør meinte mange var det beste i

rennet. Hans Olav Sørensen, 21-åringen frå Mebonden som satsar på VM – laget

neste vinter, sette bakkerekord med 60,5 meter. Heilt ned i overgangen , med fjellstøtt

nedslag.

Sunnmøre Arbeideravis melde i fyrste papirutgåve etter rennet om storslagne premiar:

- Aldri har vel Sunnmøre vartet opp med gavepremier av slik verdi som Velledalen

Idrottslag kunne framvise. De som undret seg over at arrangøren hadde fått

deltakelse fra flere av landets beste hoppere, fant svaret på premiebordet. Av de ca

30 gavepremiene nevner vi: Soveværelsemøblement komplett med madrasser og

nattbordlamper. Videre stoppet sofa med to stoler, sovesofa, vi kunne telle sju

lenestoler, to salongbord, to madrasser, og meget, meget mere.

Det skal seiast at tilbakemeldingane etter rennet i 1965 ikkje var eintydig positive på sjølve

bakken. Det vart lagt merke til at Arne Larsen som i 1962 hadde tre stilfulle hopp på 56 –

56,5 og 56,5 meter, berre hoppa 53,5 – 55 – 53 meter i 1965. Spesialhopparane som møtte i

1965 var klart betre enn kombinertløpar Arne Larsen var i 62, men likevel hoppa bestemann

berre 4,5 meter lenger. Og ein kunne ikkje unngå sjå, at ein stor prosent av hopparane

hadde problem med overgangen, som hadde vorte FOR SKARP etter Velledalen IL si eiga

utgraving. Og som ein etter rennet i 1965, langt på veg kunne omtale som mindre vellukka.

Dei to beste (Flytør og Sørensen) sa det slik til Sunnmørsposten:

- Vi kjem gjerne tilbake til Brunstadbakken, sa Hans Olav Sørensen etter rennet, det

var ikkje minst premiebordet han tenkte på. Betre bakkar har han sikkert hoppa i, så

det var nok ikkje berre den Sørensen tenkte på.

- Men dersom det vert bygt tilrenn og høgare hopp, kan bakken bli mykje betre. Også

nedst i bakken må det gjerast nokre endringar. Overgangen må gjerast lengre og flata

må gravast ut med bulldozar.

- Ingen kunst å få bakken opp til 70 meter, la Flytør til.

Resultat frå rennet (dei fem beste poengsummane):

1. Johan Flytør, BUL, 228,5 poeng (59 m – 60 m -57m) – klasse A

2. Hans O. Sørensen, Mebonden, 224,5 poeng (58 m – 60,5 m – 57,5) – Klasse A

3. Jan Olav Roaldseth, Fram 07, 218 poeng (56,5 m – 60 m – 56 m) – klasse A

4. Ingolf Mork, Fram 07, 216,5 poeng (54,5 m – 60 m – 57 m) – Yngre junior

5. Arne Larsen, Heggedal, 214,5 poeng (53,5m – 55 m – 53 m) – klasse A.

Lokale resultat:

166,0 poeng: Sverre Nyhus, Stranda, - nr 2 i klasse C

156,0 poeng: Lars Taraldset, Hornindal – nr 4 eldre junior

146,0 poeng: Arnold Lyshol, Sykkylven - nr 4 yngre junior

145,5 poeng: Olav P. Hole, Velledalen – nr 1 klasse D

143,5 poeng: Arnold Bolstad, Velledalen, - nr 5 yngre junior

Heim i irritasjon. Sjølv om Velledalen IL fekk ros frå mange hald for arrangementet 27.mars

1965, reiste mange heim i irritasjon. Før rennet reklamerte Velledalen IL i renn-annonsa

med:

GOD PARKERING – BRØYTET VEG TIL BAKKEN!

Vi lar Sunnmøre Arbeideravis skildre kva som møtte tilreisande i eigen bil etter rennet:

- Som vanlig hos Velledalen Idrottslag var arrangementet førsteklasses. Det er en ting,

som arrangøren ikke kan noe med, vi må peke på. Parkeringstilhøva ved

Brunstadbakken må det gjøres noe med. Som forholdene var lørdag, måtte folk vente

opptil to timer etter rennet var slutt, før de kunne komme seg heim. Slikt framtvinger

irritasjon.

- Forholdet var at lensmannen nektet bileierne å parkere på riksvegen. De ble henvist

til Nakkebergvegen, men denne var så smal at forbikjøring var umulig, dermed var en

avhengig av de foranstående bilene før en kunne komme seg ut. Utbedre denne

Nakkebergvegen Sykkylven Kommune, så slipper en forhold som lørdag.

Historia om hopprenna i Brunstadbakken slutta her, 27.mars 1965 – med eit salig

parkeringskaos. Brunstadbakken «døydde» her. I dag ligg den attgrodd, gøymt og gløymt.

Litt trist med tanke på at renna i 1962 og 1965 var dei to største kulturelle hendingane i

Velledalen dette tiåret (ved sida av skuleopninga på Dalemyra i 1963).

Då Velledalen IL arrangerte områderenn i hopp i januar 1967, var arenaen flytta inn i

Holemarka. I det som i dag er Bjørn Ove Hole sitt beite, om lag rett overfor Jetmundbruket på

Lade. Her hoppa dei beste kring 40 meter i den største bakken.

Så kom åra 1969/1970. Då tapte hoppsporten «kampen» mot alpinsatsinga i Ladalen,

slik at på fyrste del av 1970-talet, var Ståle Ødegård Velledalen IL sin einaste

konkurransehoppar. Ikkje lenge etter han fekk prestehanda på hovudet, var det slutt også

der.

Lang pause. Etter mange år utan hoppsport i Velledalen IL melde Jan Ringseth seg til

teneste. Han kom frå Sykkylven IL, som resultat av at naboklubben valde å kutte ut

løpebanene kring eigen stadion, til fordel for kunstgras over heile anleggsflata. Dette gav

mange nye VIL-medlem. Ein av dei var Jan. Han dreiv på til framimot 80 års alderen. Ein

trottig utøvar med eit høgt tal veteran-VM, i mange ulike land. Han kan sjå tilbake på fleire

topp-3 plasseringar i eiga klasse.

Då det vart plastbakkar i Spjelkavika fekk han selskap av unge Jonny Mauren, som hadde

far som sprang for Velledalen IL (Frode). Jonny hadde god utvikling, og nådde nær 40 meter

i sine fyrst tenår. I Velledalen IL byrja vi få trua på at han kunne ta Magnar Fet sin

klubbrekord for lengste ståande hopp i renn – 53 meter frå Hornindal i 1949.

Slik skulle det likevel ikkje gå, like brått som Jonny starta, slutta han.

I skrivande stund – 25.mars 2025 – er Velledalen IL utan aktive hopparar. Magnar Fet sin

klubbrekord frå Hornindal 1949 står støtt som fjell. Den historiske susen over

Brunstadbakken sine største renn, er det naturleg nok stadig færre som hugsar. Og så vidt vi

veit kan vi ikkje skulde på manipulering av hoppdressar for at det gjekk som det gjekk, heller.

Men artig så lenge det stod på, var det!

Atle Jomar Hole

Kjelder:

Velledalen IL sin møtebok, nokre utgåver av Sunnmørsposten og Sunnmøre Arbeideravis