Trist bodskap: Arne Jan Tvervaag er død

KM-vinnar for Velledalen IL i 1960, som hoppa 3,71 meter i lengde utan tilløp i 1968.

Arne Jan Tvervaag døydde 14.mars. Han var fødd 4.juni 1943, og vart altså 81 år gamal. Arne flytta saman med familien til Velledalen som ung gut. Han viste tidleg ei stor og ekte interesse for idrett. I 1960 vart han KM-vinnar i det vi på våre kantar av landet kalla «stille lengde». Han vann klasse G 16 med resultatet 2,77 meter i eit stemne på Vigra. Velledalen IL hadde to deltakarar i stemnet, Arne Tvervaag og Roar Skoglund. Den tida Arne budde i Velledalen hadde han verv i Velledalen IL. Både i friidretts-gruppa og i Hovudstyret, der han kom inn som purung. I tillegg trena han med VRF, som målmann.

Men det var fyrste etter han flytta frå Velledalen det tok av sportsleg. I 1968 hoppa Arne Jan Tvervaag 3,71 meter i lengde utan tilløp i ein idrettshall på Noresund i Buskerud. Ein idrettshall med parkett-golv. Dette vart fyrst annonsert som ny nordisk rekord, men det viste seg at det også var verdsrekord, sidan dette ikkje var ei øving med rekordstor utbreiing. Arne sin rekord stod i nær 50 år, før den vart slegen av amerikanaren Byron Jones, under ei treningssamling for dei største talenta innan college-fotball i Amerika. Jones hoppa 3,73 meter.

     Det høyrer med til soga at Arne etter stemnet på Noresund hoppa heile 3,74. Dette resultatet vart underkjend grunna for få godkjende dommarar under stemnet.

Arne vart gravlagd frå Lunder kyrkje torsdag 27.mars klokka 14.00. Kanskje var det er form for tankeoverføring frå høgare makter, men pussig nok; gravferda var nøyaktig på same dag, og på same tidspunkt Velledalen IL markerte at det var 60 år sidan siste hopprennet i Brunstadbakken. Det visste vi ikkje då vi var samla i kaféavdelinga i Nærbutikken Velledalen til buljong, kaffi, pølser og marsipankake. Rett nok vart det snakka om at Arne var død, men vi visste ikkje at gravferda fann stad medan vi sat der.

Vi nemner at foreldra til Arne Jan Tvervaag ligg gravlagde på kyrkjegarden i Sykkylven.

Velledalen IL lyser fred over Arne Jan Tvervaag sitt gode minne!