Fekk Velledalen IL si julekule

Etter debut-løpet for Velledalen IL fekk Eldar Sindre Valkvæ klubben si julekule

Miljøet mellom løparane i Velledalen IL vert lagt merke til. Før løp nummer tre i Ålesund Vinterkarusell laurdag 11.januar, melde Eldar Sindre Valkvæ seg inn. Nettsida hadde ein liten prat med han etter at han hadde kryssa mållina på fine 22.24, etter fem km på glatt føre utan piggar:

• Eg har halde meg i god form ganske lenge, men byrja ikkje konkurrere før eg var godt opp i åra. Eg debuterte i Konradløpet i 2023 – 64 år gamal - ei festleg oppleving, både løpet og det etterpå i grendahuset.
• Eg likte miljøet under Konradløpet, og har lagt merke til i samband med andre løp, at Velledalen IL sine løparar er ein triveleg gjeng som ser ut til å ha det kjekt i lag. Difor fann eg at eg ville prøve ei innmelding der, fortel mannen som om få dagar fyller 66 år (og då gjer ein som ein vil, som det heiter i ein viss song).

Eldar Sindre brukte 18.32 under Konrad-debuten i 2023, der han vart nummer 26 av heile hurven. I 2025 har han andre planar for 1.mai, så Konrad-løpet går utan Eldar. I 2024 sprang han 10 km på 41.40-talet, som gav han sjetteplass på statistikken for alle løparar i kongeriket Noreg i klasse M 65-69. På same statistikk for halvmaraton var han kring nummer 20.

I Velledalen IL skal mannen som etter kva vi har høyrt bur på Emblem, få smake på samhaldet, klubbkjensla og at vi vil han vel!

Velkomen inn i laget vårt, Eldar Sindre Valkvæ!