Idrettshelga: Kan KM Berli slå Petter Northug jr….?

VIL-trioen Kjell Magnar Berli, Hilmar Kråkenes og Ole Martin Korsnes skal komande helg konkurrene mot Petter Northug jr.

Her er litt av det VIL-utøvarar gir seg i kast med komande helg:

• Fyr til Fyr 2024: Ei kraftprøve med lang konkurranse-tid. Tysdag 18.juni klokka 09.30 var VIL-trioen Kjell Magnar Berli, Hilmar Kråkenes og Ole Martin Korsnes mellom 145 påmelde i konkurranseklassa. Det same var Petter Northug jr. og broren Thomas. I 2023 vann Karl Idar Vik dette løpet på 6.03.54, så det er snakk om ei «lang-økt». Marius Kalland har VIL-rekorden (2023) på 6.36.07 etter 6.plass i fjor. Anne Grethe Røren Leine vart då nummer tre i kvinneklassa på tida 8.27.37. Løpet har eiga mosjonsklasse med kortare løpslengde, og med ulike startstadar.
• NM maraton, Knarvik: Dette er ikkje langt frå Bergen som betyr stor og hard deltaking. Her er det både 10 km, halvmaraton og heilmaraton. Heilmaraton i Knarvik tel som NM på distansen. Her er Sverre Gunnar Brunstad, Lørenskog FIL, mellom deltakarane i klasse M 55-59. Kjenner vi Sverre Gunnar rett – som ein meister i å bygge/prikke form – har vi trua på ein NM-medalje. Artig skal det også bli å sjå kva Espen Utgård Sæther er god for til helga. Han har meldt på Strava at han stiller på halvmaraton i Knarvik, som truleg betyr god tid i eit sterkt felt.
• Nordmarka Skogsmarton, Oslo: Storløp med heil- og halvmaraton, og kring 1200 påmelde tysdag morgon. Her stiller Anders Wigdahl for Velledalen IL i klasse M 35-39. Ei klasse med 85 påmelde i morgontimane 18.juni.
• Kaptein Dreyers Minneløp: Då er vi på Nordmøre. Eit tradisjonsrikt løp med laaang fartstid. Her vert det barneløp, trim med og utan tidtaking i tillegg til hovudløpet. På deltakarlista her dukkar Ole Peder Kristian Holmberg sitt namn opp med startnummer 112. Han representerer Velledalen IL/Jernbanens Idrettslag, Trondheim. Ole Peder har sprunge løpet før, og veit såleis kva han går til.

Dette var ei lita oversikt. Truleg skal fleire VIL-utøvarar i aksjon. Vi set pris på at deltaking i ulike løp vert melde (atlehole@online.no) og gjerne dokumenterte med foto. For oss er saktegåande deltaking like viktige som den raske. Vi ynskjer alle sympatisørar og utøvarar av Velledalen IL

EI RETTELEG GOD HELG!