Gartnaren vår fyller 67 år i dag

I dag, 15.oktober, fyller Per-Gunnar Holmberg 67 år.

Ikkje så mykje å feire, vil somme hevde. Og Per-Gunnar «feirer» heller ikkje, men han nøyer seg med å arbeide halv dag på sjølvaste fødselsdagen 15.oktober. Og uansett, det er ein liten milepæl å ha nådd den normale pensjonsalderen i kongeriket Noreg. Til medlemane i tippelaget HenKam, seier Per-Gunnar dette om å ha passert 67 år:

• Sjølv om eg no har vorte pensjonist, vil eg ikkje liggje lenger på sofaen enn før.

Som drivar av Holmbergs Gartneri – ein arbeidsplass som kastar solskin over Velledalen - er Per-Gunnar ein kjend person i eigen kommune med omland. Stort sett alle veit kven han er. Og i Velledalen IL er vi glade i han. Fordi han er ein stor sponsor – faktisk ein av dei største målt etter tal tilsette, og lønsemd i firmaet. Dessutan har han 21 Konradløp av 21 mulege. Her deltek han ikkje for å vinne, men for å halde seg i akseptabel fysisk form, i tråd med opphavsmannen (Konrad Brunstad) sitt ideal.

Vi tek også med at Per-Gunnar er mannen med flest sydenturar av nolevande velledalingar. Dit reiser han gjerne fleire gonger i året, men berre når det er «brakk-sesong» i drivhuset. Frå mars til august jobbar han meir enn nokon andre. Då er det doble skift – og vel så det.

PS. Broren Hans i Tregardane fyller også år i dag, men det skal renne nokre sveitteperler etter ryggen før han blir 67 – så vidt vi veit har han enno ikkje nådd 60 år.